Jai egun arrotz honetan, gazteok, Independentziaren aldeko bidean aurrera urratsak eman eta Euskal Herriak berezkoa beharko lukeen egutegi propioa aldarrikatu nahi dugu. Horregatik, urriaren 12an, desobedientzia eta intsumisioaren bitartez, goizean goizetik, normaltasuna irudikatuz, klasera eta lanera joateko deia egiten diogu gazteriari.
Bide honetan, goizean, tokian toki Herri Eskoletan parte hartzeko deia luzatu nahi dugu eta arratsaldean, 17:00etan Iruñeko Golem zinemetatik abiatuko den Independentistak Sarearen Martxa Berdera joateko deia egiten dugu.
Kamiseta berdea soinean, urriaren 12an, ezer ospatzeko ez dugula adierazi eta euskal egutegia aldarrikatuz, Independentziaren olatua Euskal Herriko txoko guztietan irudikatu nahi dugu.
Bizi dezagun ametsa, eraiki Independentzia!
Urriak 12, Espainiar inperioaren jaia. Guardia Zibilaren jaia. Gazteon eskubideak zapaltzen dituztenen jaia. Hau da eta ez beste ezer urriaren 12an espainiar estatuak ospatzen duena. Urteetan gure herria zapaltzen dutenen jai handia, ukazioa goraipatzeko eguna. Gazteok, aspaldi egin genuen gure herria askatasunera, independentziara, eramateko hautua. Urte guzti hauetan zehar, Espainiar estatuak inposaturiko jai egun arrotzei bizkarra eman diogu, gure dinamika eta egunerokotasunari eutsiz. Espainolismoaren egun handia, gazteok gure proiektua, independentzia, zabaltzen jarraitzeko egun bezala ulertuz, gure alternatibak garatu eta gazteria kalera ateratzeko baliatu nahi dugu aurtengoan ere. Argazkia: © Gazteherria.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun