Produktu guztiak tokikoak dira, transgenikorik gabekoak eta iraunkortasun irizpideekin produzitutakoak; ez soilik ingurugiroarekiko iraunkortasunarekin, iraunkortasun sozialarekin produzitutakoak ere badira. Bestalde, proiektu horretan lan egiten duten pertsonek lan baldintza duin eta soldata egokiak dituzte, azpimarratu dutenez. EHNEk aurrera eramandako ekimena gero eta zabalduagoa dago Euskal Herrian. "Eguzkin, Sopelan beharra sumatu genuenean eta EHNErekin batera taldea herrian aurrera eramatea erabaki genuenean, benetan ez genuen espero hain arrera beroa izango genuenik. Alde batetik, EHNEk egin duen lan azkar eta efizientea, eta bestetik, topaleku bezala Plaza Beltza kultur gunearen disposizio osoa eta parte hartzeko gogotsu ibili diren pertsona guztien partaidetza eta lana eskertu nahi genituzke", adierazi dute ekologistek.
Ez da konpromiso makala
Partaideek, gainera, aipamen berezia merezi dute, Sopelako Eguzkiren ustez, "egia delako produkzio lokala eta justizia soziala bultzatuko dituztela, baita agroekologiaz gozatuko ere". "Baina, horrekin batera, garaian garaiko produktuak kontsumituko dituzte. Dagoneko ez dute nahi dutena dendetan erosiko baizik eta antzina bezala ortuan dagoena jatera moldatu beharko dira eta horixe goraipatu nahi genuen, hori ez baita konpromiso makala egungo erosotasunaren bizimoduarekin", azpimarratu dutenez.
Dozena bat familia murgildu da Sopelako kontsumo taldean
2010ko urr. 11a, 20:20
Sopelako Eguzki taldeak bere blogaren bitartez jakinarazi du joan den ostegunean tokiko kontsumo taldea abian jarri zutela. Azaldu dutenez, "pertsona sare edo multzo bat da. Salneurri baxu eta pentsamendu pasiboan oinarritzen den produktibismo eta kontsumismoaren eraginez galtzen ari den elikatzeko eta erlazionatzeko modu bat berreskuratu nahi duten pertsonek osatutako taldea, hain zuzen ere". Baserritar eta kontsumitzaileen arteko harremanak sustatuz, Sopelako 12 familia murgildu dira elikadura subiranotasunera zuzendutako proiektu horretan. "Baserritarrak astero kontsumitzaileari aurretiaz zehaztutako produktuekin betetako otzara bat ekartzeko konpromisoa hartzen du. Kontsumitzaileak, ostera, denboraldi batean otzara jaso eta ordaintzeko hitza ematen duelarik. Otzaran denetarik aurki daiteke: barazkiak, esnea, ogia, oiloa, okela... Dena jasotzaileak zehaztutako neurrian", azaldu du Eguzkik. Argazkian, kontsumo taldean inguruko baserritarrek ere parte hartzen dute.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun