"Independentistak!" leloa irakur zitekeen pankarta atzean, bost mila lagunek baino gehiagok zeharkatu dituzte Iruñeko kaleak, gaur arratsaldean. Hego Amerikako eta Erdialdeko Amerikako jatorria duten euskal herritarrek eutsi diote horri, ekimenaren sustatzaileekin batera. Berria.info agerkari digitalak zabaldu duenez, azaroaren 6an biltzarra egingo du Independentistak sareak, bilgunea bera gorpuzten joateko asmoz. Txutxi Ariznabarreta bozeramaileak azpimarratu du Euskal Herriak independentzia nahi duela, "euskal herritarrak ere pertsona libreak" izan behar direla, "baina geuk lortu behar dugu independentzia". Horretarako, ezinbestekotzat jo du "sare berri hau" indartzen joatea. Datozen egunetan esango dute non izango den biltzarra. Diasporako kide horien mezu bat ere irakurri dute martxaren bukaeran; eta independentziaren bidean konpromisoak hartzeko dei egin dute. Argazkian, Independentistak sareko kideak gaurko manifestaziora deitzen / © Sopela.net.
Hego Amerikako herriek independentzia lortu zuteneko 200. urteurrena dela gogoratu dute antolatzaileek. Hispanitateak herri haiei ere urte askoan zapalkuntza ekarri zietela nabarmendu dute, kultura eta etniak desagerraraztera bideratu zutela zapalkuntza han. Simon Bolibarren irudia ere presente izan da. "Euskal jatorriko amerikarra izanik, hark eta harekin Espainiaren inposizioaren aurka altxatu eta iraultza egin zutenen aldeko omenaldia egin nahi dugu", azaldu dutenez. Horretarako, Bolivar irudikatzen duen txotxongilo itxurako panpina handi bat eraman dute. Musikak ere Hego Amerika eta Euskal Herria uztartu ditu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun