Euskal Herrian garai berriak datozela esan daiteke baina euskal emakumeon egoera bere horretan mantentzen da. Emakumeok sufritzen dugun indarkeria, jendartearen eremu guztietan sufritzen dugun diskriminazioaren eta bereizkeriaren ondorio latzena izanik, jendarte patriarkarraren oinarrian dagoen botere erlazioen adierazle latzena da. Emakumeon kontrako indarkeria emakumeok jendartean sufritzen dugun gutxiestetik eratortzen da eta egiturazko arazoa izanik, jendartearen eraldaketa sozialean aurkitzen da bere gaindipenerako gakoa.
Emakumeok indarkeri sexistarik gabe bizitzeko eskubidea dugu. Baina eskubideen auziari buruz ari garenean, emakumeon eskubideak era formalean errekonozituak daudela esan daiteke, baina errealitatean urratzen direnaren adibideak asko dira. Berdintasun formalaren garaian gauden honetan, eskubideen jabekuntzaren auzian dauden hutsuneak agerian utzi behar ditugu. Geure eskubideen aldeko borrokan orain arte aritu garen bezala arituko behar gara, Emakumeen Eskubideen Karta aintzat harturik.
Ezinbestekoa da beraz, emakume eta gizonezkoen arteko parekidetasuna aldarrikapen hutsaletatik aldenduz, barneratzen eta gauzatzen den konpromisoa izatera pasatzea.
Euskal Herrian aldaketa politiko eta sozial gauzatzeko prozesuaren garapenak jauzi berri eta kualitatibo bat ekarriko du gure herriaren askapen prozesuan. Emakumeok aldaketaren eragile eta aldaketan eragin beharra dugu, emakumeon kontrako indarkeriari aurre egitea ezinbestekoa baita.
Hurrengo hilabetean, azaroaren 25ean, emakumeok kalera atera behar dugu gure eskubideen alde, indarkeri sexistari aurre egin beharra dago, denon ardura da eta denon konpromisoa ezinbestekoa da. Udaletan, kaleetan, enpresetan... badugu zer eginik badugu zer borrokatu.
Urte honetan ere indarkeri kasu ugari izan ditugu. 2010an zoritxarrez dagoeneko 6 dira indarkeria patriarkalaren ondorioz eraildako emakumeak: Elena Cal (urtarrilean), Amelia Sanchez (otsaila), Isabel Velez (otsaila), Bonifacia Ruiz (apirila), Amelia Amaya (uztaila) eta Annie Froment (iraila). Gainera, bi emakume daude desagertuta, bata, Nora gasteiztarra, 2009ko urriaren 25etik ez da bere berririk; eta bestea, berriz, Maria Angeles German da eta abuztuaren 9tik falta da Urbiolako (Nafarroa) bere etxetik. Eta ezin dugu ahaztu Lizarrako emakumearen kasua edo Nagore Laffagen kasuko epaia. Argazkian, Annie Fromenten heriotza salatzeko elkarretaratzea Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun