Etxepare Institutuak gogoratu duenez, "Euskara jalgi hadi mundura" zioen euskarazko lehen idazleak eta lehen idazle haren izena daraman Etxepare Institutuak zintzo heldu dio langintza horri. Aizpea Goenagaren hitzetan, Birminghamekiko hitzarmenak zuzen-zuzenean erantzuten dio Etxepareren helburu estrategikoetako bati: euskararen irakaskuntza, ikerketa eta erabilera nazioartean bultzatzeari: "Euskara eta euskal kultura kanpora zabaltzea eta munduko komunitate ezberdinen artean euskara bultzatzeko misioarekin jaio zen Etxepare eta Birminghamgo Unibertsitatearekin egin dugun hitzarmen honen bidez, ibilbide horretan urrats bat gehiago egingo dugu".
Birminghamgoa euskarazko irakasletza bakarra da Ingalaterran eta Erresuma Batuan, eta bakarrenetakoa mundu osoan euskara eta euskal kultura goi mailako curriculum akademikoaren barnean dituztenen artean. Ikasleek euskara ikas dezakete karrerako lehen, bigarren eta laugarren urtean. Hirugarren urtea atzerrian pasatu behar dute derrigorrez, Erasmus programaren bitartez, baina kasu horretan ere euskara ikasten jarrai dezakete, hitzarmenak urte hori Gasteizen egiteko aukera eskaintzen baitu, euskaltegiko urte osoko matrikularen ordainketa barne hartuta.
Hizkuntza eskolez gain, ikasleek euskal gizartea eta kultura ezagutzeko ikasgai bat har dezakete, non Euskal Herriaren ikuspegi orokorra jasotzen duten ingelesez. Eskolez gain, hitzarmenak euskara eta euskal ondarea sustatzeko ekintzak aurreikusten ditu, bai maila akademikoan, bai maila sozialean.
Larry Trasken funtsa
Iaz, Birminghamgo Unibertsitateak Erresuma Batuan topa daitekeen euskarazko lan-bildumarik handiena eskuratu zuen: Sussex-eko Unibertsitatean irakasle izandako Larry Trask hizkuntzalari amerikarraren ondarea dohaintzan eman zion haren alargunak. Bildumak ehun bat liburu biltzen ditu, "Etymological Dictionnary of Basque" edo "The History of Basque" maisulanen egilearen bulegoa betetzen zutenak. Liburuen artean euskal fonologiari buruzko eskuizkribu bat ageri da, dirudienez argitaratu gabea.
Birminghameko Unibertsitatean euskara ikasi ahal izango da Xabi Payaren ahotik
Xabi Paya bertsolari eta itzultzaile algortarrak emanda, Birminghamgo Unibertsitateko ikasleek Euskara eta Euskal Kulturaren eskolak jaso ahal izango dituzte. Eusko Jaurlaritzako Etxepare Institutuak euskalkultura.com digitalari jakinarazi dionez, 2013 bitarteko iraupena du Kultura Saileko erakundeak eta goi eskola ingelesak sinatutako akordioak. Hitzarmena irailaren 30ean sinatu zuten Aizpea Goenaga Etxepareko zuzendariak eta Michael Whitby Birmingham Unibertsitateko zuzendariak. Hori garatzeko ardura izango du Payak, irakasle irakurle izendatu dutena. Birminghamen Larry Trask hizkuntzalari eta euskara kontuetan aditu handi zenaren euskal liburutegia dago, Trasken alargunak Unibertsitateari emana. Argazkian, Xabi Paya iaz, Euskal Herriko Bertsolari Txapelketa Nagusian, Gasteizen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun