AAMk gogoratu duenez, Beristain 2010eko martxoan ezkondu zen Meaux-Cahuconin-Neufmontiers espetxean bertan, "kartzelak horretarako eskatutako tramite guztiak egin ondoren". Emaztea Algortan bizi da, eta 2010eko irailaren 3an beraien alaba jaio zen. "Eta horrela erregistratuta dago Ikerren eta bere emaztearen familia liburuan", gaineratu du errepresioaren aurkako mugimenduak.
Frantziako espetxeetan bisitak aurrez-aurre egiten dira normalean, presoen eta bisitarien arteko kristalezko hesirik gabe. Hala ere, Frantziako espetxeetan ez dira bisita intimorik izaten. Horretara, presoek eta bisitariek elkarrekin direnean, "unean-uneko kartzelarien jokaeraren arabera, sexu-harremanak ere izaten dituzte inoiz bisita lekuetan".
AAMren aburuz, "Ikerren kasuan, behin zirriak egiten ibili zirelako 6 hilabete bisitarik gabeko zigorra ezarri zioten bere emazteari. Oraingoan, ordea, sexu-harremanak arauz kanpokoak direla eta, ezinezkoaren ondorioa izanik, ez diote alaba ikusten ere lagatzen, bere alaba dela ofizialki onartuta ere".
Meaux-Cahuconin-Neufmontiers espetxea Algortatik 974 kilometrotara dago.
Iker Beristain Gutierrez preso politiko algortarrak gose grebari ekin dio Jare bere alaba ikusteko baimena ematen ez diotelako. Uribe Kostako Amnistiaren Aldeko Mugimenduak Etengaberen bidez jakinarazi duenez, Beristain gaur bertan hasi da gose greban, eta alaba bisitan espetxera sartzeko baimena eman arte gose greban jarraitzeko erabakia duela adierazi du. Meaux-Cahuconin-Neufmontiers espetxean dauden gainerako euskal preso politikoek, Iñaki Arietaleaniz Telleria (Bergara), Beñat Aginagalde Ugartemendia (Hernani) eta Alex Uriarte Cuadradok (Gasteiz), bat egin dute algortarrarekin eta gose grebari ekin diote harekin batera. Argazkian, eskuman, auzokide bat Iker Beristainen erretratua heltzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun