Ikasleek zabaldutako oharra:
Elkartasunak 9.000 euro!
35=9000 euro? Hori ez da posible! Ez da posible ere 35 gazteri 9.000 euroko isuna jarri izana; baina bai, errealitatea da. Soto del Real, Valdemoro, Aranjuez eta Estremera espetxeetan presoei elkartasuna adierazteagatik eta euren ikasteko eskubidea aldarrikatzeagatik, identifikatuak eta galdekatuak izan gara. Hori gutxi balitz, orain guztira 9.000 euroko isuna ordaintzera behartuak gaude.
Guzti honekin batera, euskal presoek pairatzen dituzten salbuespen neurriekin eta muturreko egoerekin amaitzea, sakabanaketarekin bukatzea, preso gaixoen askatasuna eta ikasle presoen ikasteko eskubidea errespetatzea exijitzen dugu.
Azkenik, eskubide urraketa hauen aurrean eta Espainiar Estatuaren errepresio kolpe guzti hauen aurrean, kalera irteteko deia egiten dugu eta inoiz baino gehiago presoekiko elkartasuna adierazteko eta euren eskubideak errespetatuak izan daitezen ardurak hartzeko deia egiten dugu.
Gastu guzti hauen harira, "Elkartasunak 9.000 euro!" lelopean, urriaren 21ean Gasteizko gaztetxean egingo den elkartasun jaialdira joateko deia luzatzen dugu, egitaraua honakoa izango delarik: 19:30ean triki-bertso-poteoa Kutxitik zehar eta 20:30ean kontzertuak, Itziarren Semeak eta Anger taldeen laguntzarekin.
Bederatzi mila euroko isuna ezarri diete Madrilgo espetxeetara joandako 35 ikasleri
Apirilaren 15ean Madrilgo (Espainia) hainbat espetxeetara egindako martxan identifikatu eta galdekatu zituzten unibertsitarioei isunak iritsi zaizkie, Amnistiaren Aldeko Mugimenduak (AAM) jakinarazi duenez. Egunean bertan "Guardia Zibilak jazarriak" izan zirela salatu zuten ikasleek. Oraingo honetan, guztira, 9.000 euro ordaintzera behartu nahi dituzte. Hori dela eta, datorren ostegunean, urriak 21, elkartasun jaialdia egingo dute Gasteizko gaztetxean, diru guzti hori batzeko asmoz. "Elkartasunak 9.000 euro!" lelopean, 19:30ean triki-bertso-poteoa izango da Kutxitik zehar. 20:30ean, berriz, kontzertuak egongo dira, Itziarren Semeak eta Anger taldeen eskutik. Argazkia: cc-by-sa Askatu.org.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun