Epaiaren zain gelditu da Manex Zubiaga Bravo preso politiko algortarrari Espainiako Auzitegi Nazionalean egindako epaiketa. 2001eko urriaren 12an Madrilen egindako Espainiako Indar Armatuen desfilearen aurkako atentatuan parte hartzea leporatzen diote mutilari. Teresa Sandoval fiskalaren arabera, ETAren Madril komandoko kide ei ziren Ana Belen Egues Gurrutxagak eta Aitor Garcia Aliagak autoa lapurtu, lehergailuz bete eta kalean jarri zuten. Hala ere, bi horiek ez dute Zubiaga aipatu atentatuarekin lotu. "Erakundeko burkide delako" ezagutzen dutela adierazi dute, Europa Press albiste agentzia espainolak zabaldu duenez. Horretaz gain, algortarraren kontrako egozteak "bost egunez torturak pairatu ostean" egin zituela salatu du Garciak. Lapurtutako autoaren jabeak, Espainiako poliziek eta gainontzeko lekukoek ere ez dute Zubiaga atentatuarekin lotzeko daturik mahaigaineratu. Hala ere, 112 urteko zigor eskaera mantendu du fiskalak. Argazkian, Zubiaga iaz, Espainiaratu zutenean / © Espainiako Barne Ministerioa.
"ETAko kide dela aitortuta eta erakundeak berak leporatzen dioten ekintzari buruz publikoki esandakoari eutsiz" deklaratzeari uko egin dio Manex Zubiagak, Europa Pressek zabaldu duenez. Bitartean, algortarraren abokatuak absoluzioa eskatu du, bere ustez, "elementu nahikorik ez" dagoelako Zubiaga leporatzen zaizkion delituekin lotzeko. Horretaz gain, fiskalaren argudioak "kontraesankorrak" direla adierazi du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun