Landartek, bere aldetik, eskerrak eman zituen duela 10 urtez geroztik Getxoko Udalarekin dagoen kolaborazioagatik eta, aurtengo ekitaldien artean, “Iparraldea XXI” dokumentalaren proiekzioa nabarmendu zuen, Ipar Euskal Herriko egungo egoera eta protagonistak erakusten dituelako. Landartek gehitu zuenez, “jardunaldi horiei esker Ipar Euskal Herrian Getxo eta bere ekimenak ezagutzeko aukera ere eduki dugu”. Ildo horretan, Jokin Aspuru Getxophoto jaialdiaren zuzendariak ere eskertu zuen argazki erakusketaren antolaketan laguntzeko eduki duten aukera. Azkenik, Jon Cazenave argazkilariak onartu egin zuen bere abizenaren jatorriaren bilaketaren bidez inguru bizia eta oso interesgarria aurkitu duela: “norbera ezagutzeko balio handiko herria”.
Jardunaldien ekimenak
Bi urtean behin ospatzen diren jardunaldiak datorren azaroaren 7ra arte luzatuko dira (erakusketa hilaren 14ra arte) eta, antolatutako jardueren artean, mendi irteera bat, pilota partida, kantaldiak, proiekzioak, kantu afaria edo txokolate dastatzea izango dira, besteak beste. Gainera, hilaren 22an, Daniel Landarti azken 10 urteotan burutako lana eskertzeko omenalditxoa eskainiko dio Udalak. Egun horretan, Anje Duhalde kantariak Landartek berak idatzitako hitzak dituzten kantak abestuko ditu.
Ikusi Jon Cazenaveren "Herri ixilean" erakusketaren argazkietako batzuk:
Ikusi EKEren "Iparraldea XXI" dokumentala:
Atzo goizean Imanol Landa Getxoko alkateak eta Daniel Landart Euskal Kultur Elkarteko (EKE) ordezkariak jakinarazi zutenez, azaroaren 14ra arte egongo da abian Iparra Galdu Gabe jardunaldien laugarren edizioa. Jon Cazenave argazkilariaren "Herri ixilean" erakusketak eman zion hasiera arratsaldean ekimenari. Jardunaldiek hainbat kultur, kirol eta gastronomia jarduera eskainiko dituzte. Horien helburuak Ipar Euskal Herria Getxon ezagutzera emateko ekintza anitzak antolatzea eta Euskal Herriko Iparra eta Hegoaren elkar ulertzea sustatzea dira, “getxoztarren eta Ipar Euskal Herriko biztanleen arteko harremana estutze aldera”, zehaztu zuen alkateak. Argazkian, Jon Cazenave, Daniel Landarte, Imanol Landa eta Jokin Aspuru atzoko prentsaurrekoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun