Bi igande barru, hilaren 31n, kenduko dute Areetako Txurruka moilan dagoen Getxo Dinosauro Parkea. Maiatzean zabaldu zutenetik, 45.000 lagun erakarri ditu erakusketak, Udalak adierazi duenez. Hainbat dinosauroen tamaina errealeko erreprodukzioez baliatuz, historiaurreko narrasti handien mundua publikoari hurbiltzea du helburu ekimenak. Erakusketa tematiko hori aro Kretazikoan eta Jurasikoan bizi ziren izakien tamaina errealeko 16 erreprodukzioz osatuta dago. Pieza guztiak xehetasun handikoak dira eta, horri esker, bisitariek dinosauroen tamaina eta benetako itxura ezagutzeko aukera izan dute. "Kopien kalitatea ikusita, erakusketa aitzindaria da hori. Piezek itxura izugarri errealak eta xehetasun handiko egiturak dituzte. Pigmentu naturalak eskuz margotuta lortu dira. Teknologia berriak eta eskulangintza teknikak uztarturik, Europako dinosauro erreprodukzioen bilduma nagusienetako bat lortu da", jakinarazi dute Udalekoek. Argazkian, tiranosauro bat Areetan / © Getxo.net. Argazki gehiago ikusteko sakatu hemen.
Getxo Dinosauro Parkea haragijale beldurgarrienak eta belarjale erraldoiak ezagutzeko aukera eman du, narrasti hegalariekin batera. Erakusketan Tiranosaurio bikotea topa daiteke. Horiez gain, beste haragijale batzuk ere biltzen ditu: esaterako, Deynonichusa eta hain ezaguna ez den Carnotauroa. Belarjale erraldoiei dagokienez, Braquiosauro erakusgarria (50 tonako pisua zuena) da piezarik garrantzitsuena. Halaber, Triceratopsa, Euoplocephalusa, Pachicephalosauroa, Stegosauroa, Parasaurolophusa eta Pteranodona pterosauroa (narrasti hegalaria) ikusgai daude. "Helduentzako zein haurrentzako jarduera ezin hobea da erakusketa. Halaber, ekimenaren balio ludikoari eta didaktikoari esker, aipatu parkea oso erakargarria da ez bakarrik zaleentzako, baita dinosauroen mundua lehenengo aldiz ezagutu nahi dutenentzako ere", adierazi dute tokiko arduradunek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun