Jose Antonio Agirre eta Lekube Eusko Jaurlaritzaren lehenengo lehendakari eta udal agintari getxoztarraren (1931-1933) heriotzaren 50. urteurrena dela eta, Eusko Jaurlaritzak erakusketa ibiltaria antolatu du, "Agirre lehendakaria eta haren Gobernuak" izenburupean. Azaroaren 14ra arte egongo da ikusgai Bizkaiko Foru Aldundiko Ondare Aretoan, Bilboko Maria Diaz de Haro kaleko 11. zenbakian. Handik bere ibilbideari ekingo dio, Gasteiz, Getxo udalerria, Gernika-Lumo eta Donostian zehar. Gurean, abenduaren 20tik urtarrilaren 9ra bitartean egongo da ikusgai erakusketa, Algortako Fadura kiroldegiko aretoan. "Lehendakariaren beraren bizimoduaren gorabeherak erakusteaz gain, garai hartako hainbat kontu erakutsiz eta XX. mendean Agirrek zuen nortasunaren garrantzi historikoa eta lan politikoa azpimarratuko ditu" mostrak, antolatzaileek adierazi dutenez. Argazkian, apirilaren 15ean Jose Antonio Agirreri egin zion omenaldia Getxoko Udalak, Negurin plaka oroigarria jarriz.
Bigarren Errepublikan hasita, 1936ko Gerra eta Frankismo garaiko erbestealdia erakutsi nahi ditu erakusketak, 1960 urtera arte, hau da, Agirre Parisen hil zen arte. "Eusko Jaurlaritzaren lehenengo lehendakaria eta haren ondoan izandako 18 kontseilariak omendu nahi ditu, hain zuzen, nazionalista, errepublikano eta komunisten arteko hiru koalizio-gobernuetan: Gernikakoa, 1936ko Gerraren eta Bigarren Mundu Gerraren tragediak bizi izan zituena; Baionakoa, 1946an, Mundu Gerraren ondoan Euskal Herrira bueltatzeko itxaropenari eutsi ziona; eta Parisekoa, 1952an, Frankoren diktadurak ekarritako desengainua jasan behar izan zuena eta Agirreren heriotza goiztiarrarekin amaitu zena", azaldu dute Lakuako iturriek. Jose Luis de la Granja EHUko Historia Garaikideko katedraduna da erakusketaren komisarioa. Horretaz gainera, Santiago de Pablo eta Ludger Mees irakasleen lankidetza ere izan da, besteak beste.
Ikusi Agirreren zinaren antzezpena Gernikan urriaren 7an (cc-by-nc-sa Ilanda.info):
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.