Itzubaltzeta eta Santa Anako bizilagunentzat ere izango da Leioako parking berria
Getxo eta Leioako Udalek sinatutako hitzarmenaren arabera, Itzubaltzeta / Romoko eta Areetako Santa Ana auzoko bizilagunek jabetza-erregimenean erosi ahal izango dituzte, Lamiakoko Gaztelubide kalean, egun eraikitzen ari diren parkingeko 200 bat toki. Obrak 2011ko amaierarako bukatu nahi dituzte eta 389 aparkaleku izango dira guztira. Tokian tokiko alkateek azaldutakoaren arabera, Itzubaltzetako bizilagun guztiek eta Santa Anako Ibaigane, Ibaibide, Bidebarrieta, Joaquin Arellano, Novia Salcedo eta Amaia kaleetako auzotarrek izango dute aukera aipatu tokiak eskuratzeko. Parking berriak 4 solairu izango ditu. Aparkaleku bakoitzak 23.700 eta 27.100 euro arteko balioa izango du, solairuaren arabera. Argibide gehiagorako 944 356 090 telefono zenbakira deitzerik badago. Argazkian, Imanol Landa eta Eneko Arruebarrena Getxoko eta Leioako alkateak parkingaren berri ematen / © Getxoko Udala.
Gaztelubide kaleko parkingean tokia eskuratzeko aurreneko epealdia Leioako Pinueta, Lamiako eta Ibaiondo auzoetako bizilagunentzat egon da zabalik, eta jada, 180 eskari jaso dira. Bigarren epealdia dagoeneko zabalik dago Itzubaltzeta / Romoko eta Areetako Santa Ana auzoko bizilagunentzat. Horiekin batera, Leioako gainontzeko bizilagunek eman dezakete izena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun