Gaur bizi dugun ongizate mailaren ondorioz, planetan dauden baliabide naturalak ez dira nahikoak, azaldu dutenez. Erabilera horren ondorioak pertsona bakoitzak planetan uzten duen aztarna ekologikoaren bidez neurtzen dira. "Getxoztarrek, euskal populazioa bezala, bi planeta eta erdi beharko lituzkete bizitza-maila berdina mantentzeko. Horrela jarraituz gero, 2020an EAEko herritarrek 3,1 planeta beharko lituzkete baliabide naturalen kontsumoa asetzeko", tokiko arduradunen arabera. Getxoko Udalak eta Unesco Etxeak proiektu aitzindaria abian jarri dute aldaketa klimatikoari aurre egin eta getxoztarrek ingurumenaren erabileraren inguruan hausnar dezaten. Herri pobreetan kontsumoak duen inpaktu negatiboa orekatzea da asmoa, hori ingurumenari eta CO2 kontsumoari egokituz eta kooperazio proiektuak bultzatuz.
Urriaren 24ko Garapenari buruzko Informazioaren Mundu Egunaren harira aurkeztu dute egitasmoa Imanol Landak eta Mikel Mancisidor Unesco Etxearen zuzendariak. Aipatu egunean, igandean, mundu osoko iritzi publikoari garapenari buruzko arazoak eta beharrak transmititzen dizkio Nazio Batuen Erakundeak (NBE), arazoa konpontzeko nazioarteko kooperazioa sendotzeko asmoz. Oraingo honetan, bi erakundeek aukera izan dute kazetariei eta komunikabideei ondorengoa azaltzeko: "mundu mailako arazoaren irtenbidea aurrera egin dezan ezinbestekoa da, batetik, giza garapenean aldaketa-klimatikoak suposatzen duen mehatxuari buruzko informazioa hobeto hedatzea; eta iritzi publikoaren mobilizazioa, bestetik", azaldu dutenez. Ildo horretan, Mancisidorrek mezu itxaropentsua ere zabaldu nahi izan du, “klima aldaketa mehatxutzat jotzeaz gain egungo modeloa aldatzeko aukera bezala ere ulertu behar delako; baita aurrera eraman beharreko politika mota guztietan gai berritzaileak sartzeko ere”.
Euskal Autonomi Erkidegoko populazioaren aztarna ekologikoak neurtzen du eskualdeko bizi-mailaren arabera erabilitako baliabideak ekoizteko behar den produkzio eremua. Egun, mundu aztarna ekologikoak planetak birsortzeko behar duen gaitasuna %30ean gainditzen du. Agian, horregatik, egunero 200 espezie desagertzen dira, eta 2025ean egun dauden espezieen erdia desagertuko dira. Hori, giza garapenerako mehatxu globala da. Aldaketa gauzatzeko, Getxoko Udalak eta Unesco Etxeak, herritarrak kontzientziatu nahi dituzte, hedabideen bitartez.
Sentsibilizazio jarduerak
Lehenengo jarduera gaur bertan egin dute,k omunikabideekin batera. Proiektuaren aurkezpenean, Aitana Uria Unesco Etxeko Aldaketa-klimatiko arduraduna eta Florent Marcellesi Bakeaz erakundeko ikertzailea izan dira, Landa eta Mancisidorrekin. Horiek, azalpen labur bat egin diete, kazetariei klima-aldaketaren dimentsioak eta garapenerako dituen ondorioen gainean. Lehenengo ekitaldi horretan, eurek duten rol garrantzitsuaz kontzientziatu nahi izan dituzte komunikabideen profesionalak, "horiek baitira arazo globalen inguruan arreta piztu dezaketenak; bereziki klima-aldaketak herri pobreen garapenean suposatzen duen mehatxua". Horretarako, gai horren inguruko tresnak eta materialak banatu zaizkie. Gainontzeko jarduerak (erakusketa, lan-tailerra eta zine-foruma) abenduan izango dira.
Komunikabideak klima-aldaketaren kalteen berri ematera deitu dituzte Unesco Etxeak eta Getxoko Udalak
Munduko biztanleria osoa euskal populazioa bezala biziko balitz, bi planeta eta erdi beharko lirateke gaur egungo ongizate maila mantentzeko eta naturaren gehiegizko ustiatzea parekatzeko, Getxoko Udalaren eta Unesco Etxearen arabera. Bi erakundeen helburua gure gizarte-kontsumoaren aztarna ekologikoak herri pobreetan dituen ondorioak jakinaraztea da. Bide horretan, proiektu bat aurkeztu dute gaur, tokiko komunikabideekin batera eskainitako lan gosarian. “Proiektuak herri pobreen garapenean klima-aldaketak duen eragin negatiboaren inguruan Getxoko herritarrak sentsibilizatzea eta informatzea du xede, baita inpaktu negatibo hori zuzentzeko behar diren tresnen inguruan eztabaida piztea ere”, azaldu du Imanol Landa alkateak. Proiektuak hainbat jarduera hartuko ditu: erakusketa, lan-tailerra tokiko elkarteekin eta zine foruma, azkenik, non klima-aldaketaren ondorioak eztabaidatu eta hausnartuko diren. Argazkian, Florent Marcellesi, Aitana Uria, Mikel Mancisidor eta Imanol Landa gaurko lan gosarian / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun