Iker Beristain algortarrak gose greban jarraitzen du, Meaux-Cahuconin-Neufmontiers espetxe frantziarrean dauden beste hiru euskal preso politikoak bezala. Iñaki Arietaleanizek (Bergara), Beñat Aginagaldek (Hernani) eta Alex Uriartek (Gasteiz) ere baraualdian sartzea erabaki zuten urriaren 14an, Berisi Jare bere alaba jaioberria ikusteko baimena ematen ez diotelako. Hori lortu arte, gose greban jarraitzeko erabakia dutela adierazi zuten laurek, orain sei egun zabaldutako oharrean. "Ikerren etxekoek baina ez dakite horrezaz gain besterik", Uribe Kostako Amnistiaren Aldeko Mugimenduak Etengabe bitakoraren bitartez zabaldu duenez. Errepresioaren kontrako erakundeak azaldu duenez, "preso prebentiboak izanik Frantziako espetxeetan ez dute telefonoz hitz egiteko eskubiderik. Eta azken asteburuan zuten bestelako bisitarik ere izan". Kontutan hartu behar da Meaux-Cahuconin-Neufmontiers espetxea Getxotik 974 kilometrotara dagoela. Bitartean, ostiral honetan, hilak 22, mobilizazioa egingo dute Algortan, Iker Beristainen egoera salatzeko. Hitzordua 20:00etan jarri dute Telletxen. Argazkian, Iker Beristain / cc-pd Etengabe.
"Hasiera batean kartzelako zuzendariak onartu zion alabaren bisitatzeko baimena, baina Le Vert epaileak ez zuen baimen hori onetsi. Espetxeko zuzendariari azalpenak ere eskatu zizkion, preso egonik nola izan dezakeen umerik espetxean, eta honek bisitak ongi zainduak direla eta hori ezinezkoa dela erantzun bide zion, Ikerren abokatuari adierazi zionez", azaldu du Uribe Kostako AAMk. Gaineratu dutenez, "espetxeko erantzunak ez zuela konbentzitu ere esan zion eta azalpenak idatziz emateko eskatu dizkio emazteari". Tramite horiek eginda orain epailearen erabakiaren zain dago auzia. Hala ere, zehaztu dutenez, ez da lehenengoa kasua: preso ugarik izan ditu umeak Frantziako espetxeetan, eta preso diren emakumeak ere haurdun gelditu izan dira. "Le Vertek ondo baino hobeto ezagutzen ditu espetxeetako kontuak eta, horretara, Ikerri ezarritako debekuak euskal preso politikoen aurkako epailearen mendeku itxura guztiak dauzka", salatu dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun