Espainiako Polizia Nazionala goizeko 7:20 aldera hasi da miatzen Itzubaltzeta / Romoko herriko taberna. Hasiera batean, kalea moztu dute agenteek, baina ondoren kale kantoi bakoitzean pare bat polizia jartzera mugatu dira, jendea eta ibilgailuak pasatzen utziz. Hala ere, kazetariei baino ez diete utzi Branka aurrean gelditzen. Gutxi gora behera, 11:15ak arte barruan eduki dute goizaldean Algortan atxilotu duten Imanol Beristain 27 urteko militante independentista. Lau orduz Barrikako bere etxea arakatzen ibili ostean eraman dute bertara. Tabernatik lauzpabost kutxa, betetako zakar poltsa, kartelak eta pankartak eraman ditu poliziak. Miaketa bukatuta konturatu dira Brankakoak goiko pisuko armairuak ia hutsik utzi eta barra zein aldean eramateko ordenagai banaren disko gogorrak ere hartu dituztela. Dirua, ordea, ez dute ukitu ere egin, lekukoek aipatu dutenez. Bitartean, San Jose eliza parean zain zeuzkan Beristainek 40 bat herrikide, hari elkartasuna adierazteko asmoz. Tabernatik atera dutenean areagotu dira itzubaltzetarraren aldeko eta poliziaren kontrako oihuak. Agenteek istiluen kontrako materiala jarri arren, ez da gorabeherarik suertatu. Argazkian, poliziak Branka inguruan.
Fernando Grande-Marlaska Auzitegi Nazionaleko epaileak aginduta, gutxienez 13 gazte independentista atxilotu ditu goizaldean Espainiako Polizia Nazionalak, Amnistiaren Aldeko Mugimenduak zabaldu duenez. Hala ere, zabalik jarraitzen du polizia operazioak, Barne Ministerioko iturriak aipatuz albiste agentzia espainolek zabaldutakoaren arabera. Branka herriko tabernara giltza erabilita sartu dira poliziak, lekukoek UKBERRI.NETi adierazi diotenez. Bertara, bereizgarririk gabeko pare bat autotan hurbildu dira kalez jantzitako eta burua estalitako agenteak, ingurua zaintzeaz arduratutako zortzi uniformedunak zihoazen furgonetak lagunduta. Kotxe horietako batean eraman dute Beristain. Iluntzerako mobilizazioa deitu dute Itzubaltzeta / Romon, euren herrikidearen atxiloketa salatzeko. Hitzordua 20:30ean jarri dute, Kolas plazan.
Bestelako gertaerak
Goizeko 5ak aldera, dispositiboa jarri du Sopelan Ertzaintzak, auzokideek UKBERRI.NETi adierazi diotenez. Ahoz aho heldu zaie Guardia Zibila ere inguruan omen zebilela. Bestalde, aipatu udalerrian edukiontzia erre dute ezezagunek. Hala ere, lekukoek ez dute zehazterik izan zer gertatu den lehendabizi eta zer ondoren.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.