Bestalde, bertaraino garraio publikoa erabilita gerturatzea gomendatu diete, uretan zein uretatik kanpo, ekimenean parte hartu nahi dutenei. Izan ere, Bizkaiko Zubi inguruetan ez da izaten aparkatzeko leku nahikorik. Giza-katea osatzeaz gain, hamaiketakoa, salda, musika, dantzak, bertsolariak... izango dira.
Irakurri Itsasoruntzek zabaldutako oharra:
Guztion artean elkarrizketaren katea osa dezagun!
Egun bizi dugun egoerari bultzada emateko, elkarrizketa sustatzeko, azaroaren 13an, larunbata, uretan elkartuko gara. Goizeko 10:30ean, Areetako Bizkaiko Zubiko plazan jarri dugu hitzordua, Ibaizabal itsasadarreko bi aldeak giza-katez lotzeko. Surf ohola aldean, bustiko diren ehun lagun behar ditugu, gutxienez. Bizkaiko Zubi inguruak konpromiso, esperantza eta bake eta justiziaren koloreez tindatuko dugu. Beraz, kamiseta gorria, berdea edo zuria jantzi eta murgil zaitez prozesuaren uretan. Parte hartzeko asmorik badaukazu bota mezua ondoko helbide elektronikora: itsasoruntz[abildua]gmail.com
Baina, uretan ez ezik, lehorrean ere prozesuaren alde "bustiko" diren lagunak behar ditugu. Euskal Herriak bizi duen gatazkaren konponbidea denon esku dago eta, banatzen gaituzten ezberdintasun guztien gainetik, gure arteko elkarlana sustatzea berebizikoa da. Guztion artean sortu behar ditugu prosezu berri bat abiarazteko beharrezkoak diren baldintzak. Prozesua gu gara, herria da. Gogor lan egin dezagun itxaropena agortu ez dadin. Gaurko indarrak biharko malkoak saihestuko ditu. Beraz, itsasadarraren bi aldeak ere konprometitutako herritarrez bete ditzagun azaroaren 13an.
Hiru zutabe dauzka gure aldarrikapenak:
1. Elkarrizketa eta alde orotariko akordioa, Euskal Herri osoan eta euskal hiritar guztiontzat, bazterketarik gabe.
2. Eskubide zibil eta politiko guztien errespetua eta bermea.
3. Giza eskubide indibidual eta kolektibo guztien errespetua eta bermea.
Urriaren 29an, batzar irekia:
Ildo berean, larunbat horretako ekimenari azken ukituak emateko, ostiral honetan, urriak 29, Algortako Bihotz Alai plazan egingo dugun batzar irekira gonbidatu nahi zaituztegu. Ordua gaueko 10etan jarri dugu.
Etor zaitez elkarrizketaren katea osatzera!
Itsasoruntz
http://itsasoruntz.nireblog.com
http://facebook.com/itsasoruntz
http://twitter.com/itsasoruntz
Itsasadarraren bi aldeak elkarrizketaren giza-kateaz lotuko ditu azaroaren 13an Itsasoruntzek
Azaroaren 13an, larunbata, Ibaizabalgo uretan murgilduko da berriro Itsasoruntz ekimena, "egun bizi dugun egoerari bultzada emateko, elkarrizketa sustatzeko". Goizeko 10:30ean jarri dute hitzordua, Areetako Bizkaiko Zubiko plazan, itsasadarreko bi aldeak giza-katez lotzeko asmoz. Hori lortzeko, gutxienez, bustiko diren ehun lagun behar dituztela adierazi dute antolatzaileek. Nola ez, surf ohola aldean eraman beharko dute horiek. Horretaz gain, kamiseta gorria, berdea edo zuria jantzi beharko dute, "Bizkaiko Zubi inguruak konpromiso, esperantza eta bake eta justiziaren koloreez tindatzeko". Hala ere, bestelakorik (piragua, txalupa...) eramateko aukera ere egongo da, surflariei babesa emateko. Parte hartu nahi dutenek itsasoruntz[abildua]gmail.com helbide elektronikora mezua bidal dezakete. Hori bai, taula daukaten ala ez zehaztu beharko dute. Materiala eramatea aurreikusi dute deitzaileek. Hala ere, soberako zenbat surf ohola beharko diren aurretik jakitea komeni da. Baina, uretan ez ezik, lehorrean ere "prozesuaren alde bustiko diren lagunak" behar dituzte. Gauzak horrela, azaroaren 13an, itsasadarraren bi aldeak ere "konprometitutako herritarrez" betetzera deitu dute. Batzuentzat zein besteentzat, ekimenari azken ukituak emateko batzar irekia egingo dute ostiral honetan, urriak 29, Algortako Bihotz Alai plazan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun