Fiskaltzak 15 urtetatik 10era murriztu du lau auzipetuentzat eskatutako espetxe-zigorra; diru publikoak bidegabe erabili izanaren salaketa kendu du, baina "ETAko kide izatea" leporatzen die oraindik. Hain zuzen, aipatu akusazioa kendu die fiskalak Joseba Mikel Garmendia, Loren Arkotxa, Xabier Alegria eta Xabier Iragorri auzipetuei. Horrenbestez, auziperatu guztientzat eskatzen dute orain 10 urteko espetxe zigorra. Horretaz gain, Udalbiltza-Kursaal, Udalbiltza Partzuergoa eta Euskal Garapen eta Kohesio Funtsaren behin-betiko itxiera eskatzen du fiskalak.
Ostiral eta larunbateko kontzentrazioak iruditan:
Udalbiltzako auzipetuek egindako deiari erantzunez, larunbatean, dozenaka herritarrek bete zituzten plazak Euskal Herri luze eta zabalean, aipatu herritarrei elkartasuna adierazi eta ezker abertzaleko Udal Hautetsien Bilkuraren lana "guztiz zilegi" dela aldarrikatzeko asmoz. Besteak beste, Erandion, 28 gizon-emakume elkartu ziren Irailaren 23a plazan, udaletxe aurrean, eguerdiko 12etan. Ordu bete beranduago, Algortako Kasino plazan egin zuten kontzentrazioa 45 lagunek. Sopelan ere protesta 13:00etan egitea erabaki zuten: 50 bat auzokide batu ziren udaletxeko plazan, Sopela.net agerkari digitalak zabaldu duenez. Ostiralean, berriz, 70 bat ikasle bildu ziren Uribe Kosta institutu plentziarrean, Udalbiltzako auzipetuei euren elkartasuna eta "babes osoa" adierazteko asmoz. Bitartean, Espainiako Auzitegi Nazionalean gaur ekin diote berriro 21 alkate, zinegotzi eta Udalbiltzako langileren kontrako epaiketari. Bihar edo asteazkenean epaia emango dutela espero da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun