Gaurko manifestazioan zehar "inkomunikazioak tortura ahalbidetzen duela" salatu dute eta bihar 20:00etan Itzubaltzeta / Romoko Kolas plazan berriro manifestatzera deitu dute. Bildutakoek larunbatean Donostian torturaren aurka egingo den manifestazioari atxikimendua agertu diote.
Imanol Beristain eta ostiralean atxilotutako beste 13 gazte independentistak askatzeko aldarrikatu dute gaur iluntzean Itzubaltzeta / Romon 160 auzokidek. Senideek eta abokatuek adierazi dutenez, itzubaltzetarraz ez daukate inolako albisterik eta ez dakite Fernando Grande-Marlaska epailearen aurretik gaur igaro diren lau atxilotuetako bat den ala ez. Europa Press albiste agentziaren arabera, berriz, Xabier Bidaurre, Ruben Villa, Ibon Esteban eta Ander Maeztu dira magistratuak gaur hartu dituen gazteak eta horiek espetxeratzeko agindu du. Gauza bera egin du ostiralean Italiatik Espainiara eramandako Zuriñe Gogenola, Artzai Santesteban eta Fermin Martinezekin. Joan den asteko sarekadan atxilotutako gainontzeko neska-mutilak, Beristain barne, bihar igaroko omen dira Grande-Marlaskaren aurretik. Argazkian, joan den astean egindako manifestazioetako bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun