Koska Uribe Kostako irrati libreak FMko 108.0 bere diala eskainiko dio hemendik aurrera Info7 irratiko "5etako diligentzia" magazinari. Izenak dioen bezala, arratsaldeko 5etan emititzen da, astelehenetik ostiralera, Agin Rezola esatariak gidatzen duen kultur eta albiste saioa. Gaur izango du estreinaldia Uribe Kostako antenan eta, besteak beste, Ur Apalategi idazlea elkarrizketatuko dute. Rezolak berak aitortu duen bezala, “sentsazio onak” dira magazinean, baina “txisteak ez hainbeste”. Koska irratiko lagunek azaldu dutenez, "denboraldi hasiera honetan, handik hona dabiltza Koska irratiko esatari, teknikari eta laguntzaileak, grabagailuak, mikroak, CDak, irratia duten sakeleko telefonoak eta interferentzien aurkako hauts magikoak daramatzatela. Beti presaka baina beti garaiz, programen arteko denbora-espazioa laburtzeko beti prest. Horregatik, ezer hobea ez zaigu otu '5etako diligentzia' hartzea baino". Argazkian, Koska irratiko estudioa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun