Bihar ere mobilizazioak izango dira gazte independentisten aurkako sarekada salatzeko. Izan ere, GaztEHerria erakundeak, Gernikako Akordioko alderdiek, Ikasle Abertzaleek eta Presoen Aldeko Taldeek mobilizazioak deitu dituzte goiz zein arratsaldez. Goizean, GaztEHerriak “Gazte altxa!” lelopean paro eta mobilizazioak deitu ditu 11:30etik 12:30era ikastetxe eta unibertsitateetan. Horiek bat egingo dute hileko azken asteazkena dela eta PATek campusetan deitutako bateratzeekin.
Arratsalderako, berriz, Gernikako Akordioaren sinatzaileek elkarretaratzeak prestatu dituzte Bilbo, Donostia, Gasteiz eta Iruñean, "Aski da! Bakebidean aterabide demokratikoak orain!" lelopean. Bizkaiko hiriburuko elkarretaratzea Arriaga plazan egingo dute, 19:30etik aurrera.
Espainiako Auzitegi Nazionalean gaur deklaratu duten hamar gazteetatik bederatzi espetxeratzea agindu du Fernando Grande-Marlaskak, tartean Imanol Beristain itzubaltzetarra dagoela, Europa Press albiste-agentziak zabaldu duenez. Aurretik, hori bera eskatu dio Vicente Gonzalez Mota fiskalak. Atzo ere, bere bulegotik igarotako sareakada bereko beste lau gazteak espetxeratzeko agindua eman zuen Marlaska epaileak. Guztiei "erakunde terroristako kide izatea" leporatzen die Gonzalez Motak. Bartzelonan atzemandako Marina Sagastizabal 21 urteko emakumeari, ordea, 10.000 euroko bermea ezartzea eskatu du fiskalak, "Segi orain hiru hilabete utzi zuela eta". Bitartean, gaurkoan 155 lagun inguruk egin dute manifestazioa Itzubaltzeta / Romon, Beristain eta gainontzeko atxilotuen askatasuna aldarrikatzeko. Hala ere, Amnistiaren Aldeko Mugimenduak ez du itzubaltzetarraren inguruko argibiderik ematerik izan. Argazkian, Espainiako Polizia Nazionala Beristain eramaten Brankako miaketaren ostean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun