Arratsalderako, berriz, Gernikako Akordioaren sinatzaileek elkarretaratzeak prestatu dituzte Bilbo, Donostia, Gasteiz eta Iruñean, "Aski da! Bakebidean aterabide demokratikoak orain!" lelopean. Bizkaiko hiriburuko elkarretaratzea Arriaga plazan egingo dute, 19:30etik aurrera.
Amnistiaren Aldeko Mugimenduaren lehen balorazioa:
Igor Portu eta Mattin Sarasola torturatu izana egotzita hamabost Guardia Zibil epaitzen ari diren diren aste honetan bertan Espainiako Polizia Nazionalak tortura erabili du beste behin pasa den astean atxiloturiko gazte independentisten aurka. Espainiako Gobernuak mezu argia eman nahi izan du tortura hauen bidez, prest dagoela errepresiorik ankerrenarekin jarraitzeko Euskal Herrian ireki den prozesu politikoa saboteatzeko.
Inkomunikazioak bide eman die poliziei gazteak nahieran torturatzeko, beste behin ere inkomunikazioaren eta torturaren arteko lotura agerian utziz.
Gaurko honetan PNVri galdetu beharrean aurkitzen gara antzeko operazioekin jarraitzea eta gazteak torturatzea ere Madrilen sinaturiko akordioen parte ote diren. Azken tortura kasu larrien aurrean jeltzaleen erakutsi duten isiltasunak ankerkeria honen bidelagun egiten ditu, herri honetan jada ezkuta ezina delako PSOEren gobernua tortura latzak erabiltzen ari dela atxiloturiko euskal herritarren aurka. Honen aurrean isilik dagoena horrela erabaki duelako dago isilik.
Amnistiaren Aldeko Mugimendutik dei egin nahi diegu herritarrein torturaren aurrean kalera ateratzeko.
Azken sarekadan atxilotutako 14 gazte independentistak Madrilgo (Espainia) Soto del Real eta Alcala espetxeetan sartu dituzte, Amnistiaren Aldeko Mugimenduak (AAM) zabaldu duenez. Hala ere, horietako batek bermea ordainduta libre gelditzeko aukera izango du. Bartzelonan atxilotutako Marina Sagaztizabal 10.000 euro ordaindu eta gero aterako dute kartzelatik. AAMk ez du zehaztu Imanol Beristain itzubaltzetarra espetxe bietatik zeinean daukaten. Bitartean, inkomunikaturik egon diren aldian, atxilotuak "fisikoki eta psikologikoki torturatuak" izan direla salatu du errepresioaren kontrako erakundeak. Aipatu dutenez, "Imanol Beristainek ubeldura handia du saihets baten inguruan, jasandako kolpeen ondorioz". Gaurkoan ere protesta ugari izango dira. Goizean, GaztEHerriak “Gazte altxa!” lelopean paro eta mobilizazioak deitu ditu 11:30etik 12:30era ikastetxe eta unibertsitateetan. Horiek bat egingo dute hileko azken asteazkena dela eta PATek campusetan deitutako bateratzeekin. Argazkian, Espainiako Polizia Nazionala Beristain eramaten Brankako miaketaren ostean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun