![](http://farm5.static.flickr.com/4097/4942032582_5d0ddc0568_m.jpg)
Urritik abendura bitartean, hainbat ekimen antolatu dituzte, Areetako Eskoletako plazan lekuturiko Kukupraka udal ludotekan. Ostiral honetan, hilak 29, 5 eta 11 urte arteko neska-mutilentzako kamiseta tailerra egingo dute, 15:30etik 19:30era. Azaroaren 26rako, berriz, malabarismo eta aurpegi margotze tailerra prestatu dute, aurreko ordutegi berean. Bestalde, abenduaren 23an, txangoa egingo dute Olentzeroren etxera; Mungiako Izenaduba basora, alegia. Irteeran parte hartzeko izenemate epea abenduaren 1etik 15era egongo da zabalik. Txangoa arratsaldez egingo dute, bi txandatan: 17:00etan eta 17:30ean. Autobusa 16:15ean irtengo da Areetatik. Ekintza guzti horiek bazkide direnei zein ez direnei daude zuzenduta. Hala ere, ludotekako kideek lehentasuna izango dute. Argazkian, Areetako Ludotekako umeak judo tailer batean / © Getxoko Udala.