Gizon bat atxilotu dute indarrez tira eginda emakume bati poltsa lapurtu diolakoan Sopelan
Sopelako Udaltzaingoak A.P.P. inizialak dituen 28 urteko gizon barakaldoarra atxilotu zuen atzo, asteazkena, herrian gertatutako lapurreta biren egilea delakoan. Ustezko gaizkileak atzo bertan burutu ei zuen leporatzen dioten bigarren delitua. Josu Landaluze alkateorde eta Herrizaingo zinegotziak azaldu duenez, goizeko 8ak aldera, indarrez tira eginda ostu zioten poltsa emakume bati, Bentatxu kalean. Bulegoan abisua jaso ostean, andrearekin harremanetan jarri ziren udaltzainak, behin lapurra nolakoa zen jakinda, horren bila abiatzeko. Horretaz gain, gertakarien unean gaizkileari erori omen zitzaizkion ibilgailu baten giltzak eman zizkien poliziei. Herriko zenbait kale miatu ostean, Loroño kalean aurkitu zuten autoa; aurretik Sestaon lapurtua, udal iturrien arabera. Goizeko 8:30ak aldera, berriz, emakumeak egindako deskribapenarekin bat zetorren pertsona batekin egin zuten topo udaltzainek. Atxilotu eta Ertzaintzaren esku utzi zuten.
Ertzaintzak irailean Sopelan ere gertatutako beste lapurreta bat egotzi dio atzo atxilotutako lagunari. Orduan, bihurkin batekin mehatxatu ostean, poltsa ostu zioten goizaldean 15 urteko neska bati. Dagoeneko epailearen esku utzi dute A.P.P. inizialak dituen 28 urteko barakaldoarra.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun