Erandioko Asua auzoan egindako lindano zabortegi "ilegal eta klandestinoari" buruzko auziaren artxibatzea berretsi egin du Bizkaiko Probintzia Auzitegiko lehen aretoak. Bilboko 7. Instrukzio Epaitegiak martxoan deliberatu zuen kausa amaitutzat jotzea. Lur Maitea elkarteak, ordea, erabaki horren aurka egin zuen. Oraingo honetan, Espainiako Auzitegi Konstituzionalean baino ezin daiteke aurkeztu errekurtsoa. Hori bera egingo dutela aipatu du Consuelo Elosua lehen aipatu talde ekologistako bozeramaileak. Lur Maiteak aspaldi aurkeztu zuen salaketa eta 1394/03 zenbakiko auzian Euskalduna zabortegian lindano bota izanaz gain, hondakin arriskutsuak Argalariora eraman ondoren zabortegiko eremua behar bezala garbitu gabe Prycari saldu eta merkataritza gune handia (egun, Carrefourrena dena) eraikitzen utzi izana ere leporatu zien Eusko Jaurlaritzari, Erandioko Udalari, Ihobe SA ingurumen kudeaketarako enpresa publikoari eta Edificaciones Industriales Asua SA (Edinasa) enpresari. Argazkian, Esther Larrañaga Eusko Jaurlaritzaren Ingurumen sailburu ohiak ere auziperatu gisa deklaratu behar izan zuen / © Eusko Alkartasuna.
Sumarioa 2003an hasi bazen ere, lehenengo aferak 1995ekoak dira. Orduan, Edinasa enpresak Erandioko lur batzuk erosi zituen eta lehenengo lanak egin zituztenean, bertan 2.500 bat tona lindano topa zuten. Lindano hori Euskalduna zabortegira eraman zuten, 2002ra arte. Lur Maiteak salatu zuenez, lindanoa Europako Batasuneko funtsak jasotzen dituen Argalarioko zabortegira eraman ondoren, Euskalduna zabortegia ez zuten garbitu. Halere, lur horiek kutsatuta ez zeudela egiaztatzen zuen txostena sinatu zuen urte horretan Iñaki Ezkurra orduko Ingurumen sailburuordeak. Horrela, Pryca nazioarteko enpresari lurrak saldu eta bertan merkataritza gune handia eraiki ahal izan zen. Ekologistek egindako salaketak, baina, 2006an baieztatu zuen Espainiako Toxikologia Institutuan. Dagoeneko Carrefour supermerkatua dagoen lurretan artsenikoa, kadmioa, nikela, beruna eta kromoa topatu zuten egindako azterketan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun