Lemoizko eskolarako garbitzaileen lan-poltsa zabalduko dute etzi
2010ko urr. 31a, 22:55
Etzi, asteartean, Bizkaiko 35 udalerriko Lehen Hezkuntzako ikastetxe publikoetan garbiketa langileen ordezkapenak egiteko hautagaien zerrendak zabalduko ditu Hezkuntza Sailak. Tartean, Uribe Kostako ikastetxe bakarra sartuko da aipatu lan-poltsa batean, Lemoizko eskola, alegia. Interesatuek dagokien zonaldean soilik parte hartu ahal izango dute eta, gauzak horrela, gure eskualdean 18 urtetik gorako lemoiztarrek baino ezin izango dute izena eman, B09 barrutian egin beharko dutela derrigorrez. Lemoiz ez ezik zonalde horretan Arratzu, Bermeo, Gernika-Lumo, Mungia, Bakio, Busturia, Kortezubi, Forua, Gatika, Ibarrangelu, Laukiz, Mendata, Mundaka, Muxika, Nabarniz eta Sukarrieta ere badaude. Argazkiak, umeak Lemoizen jolasten / cc-by-sa Luistxo eta Marije.Interesatuek ostiralera arte izango dute dokumentazioa aurkezteko epemuga. Bilboko Kale Nagusiko 85. zenbakian dagoen Eusko Jaurlaritzako ordezkaritzan, Zuzenean zerbitzuan, egin ahal izango dute hori. Eraman behar diren dokumentuak eskaera, Espainiako Nortasun Agiriaren kopia eta bizilekua egiaztatzen duen agiria dira. Zerrendak EAEko aldizkari ofizialean 2009ko martxoaren 31n argitaratu zen Sukalde eta Garbiketako langileen ordezkapenetarako araudiaren arabera eratuko dira. Zozketa batek erabakiko du lan-poltsaren barruko ordena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun