Bete beharreko baldintzak:
Ikasketak egiteko aldi osoan Sopelan erroldatuta egotea ikasketak iraun bitartean eta egoera hau amaierara arte mantentzea, eta, gutxienez ere, 16 urte beteta izatea; Sopelako Udal Euskaltegian matrikulatuta ez egotea; Sopelako Udal Euskaltegiak eskainitako ikastaroetan parte hartzeko ezintasuna izatea; Interesatuak aurrez eskaera egin izana; Matrikularen prezioa edo ezarritako ikastaroaren prezioa aurrez ordaintzea, jarritako epean; Diru-laguntza eskatu den maila edo mailetan emandako eskola ordu guztien %80 jasotzea gutxienez ere, edo matrikulatutako maila gainditzea; Sopelako Udalari ordaindu beharreko zerga, tasa eta prezio publikoetan egunean egotea; Diruz laguntzeko eskatzen den maila, eskaera egin den urte berean edo aurrekoan ordaindu eta hasi izana; eta Zentroko ikasle bezala baja ez hartzea, diru-laguntza eskatzen den mailak edo mailek dirauten bitartean.
Aurkeztu beharreko agiriak:
Udalak diru-laguntzen eskaera egiteko espresuki prestatutako idazkia, behar bezala beteta; NANaren fotokopia; Euskaltegiak egindako ziurtagiria; Beste administrazio edo erakunderen bati diru-laguntza eskatu bazaio, eskatutako eta, hala badagokio, emandako diru-laguntzen zinpeko aitorpena aurkeztu beharko da; Matrikularen ordainagiria; Udal Euskaltegiak luzatutako agiria, ikaslea bertan matrikulatzeko ezintasunaren berri ematen duena; eta Enpresak zein ikasketa-zentroak luzatutako agiria, ikaslea beste udalerri batean lanean zein ikasten dabilela egiaztatzen duena.
Deialdia onartzen duen dekretua iragarki-oholean argitaratu eta hurrengo 20 egunetan aurkeztu ahal izango dira eskariak, beti ere eskari-orri normalizatuan eginda eta behar bezala beteta; deialdi honen eranskin gisa doa eskari-orriaren eredua. Diru-laguntzak hurrengo urteko urtarril eta otsailean zehar ordainduko dira, eskaera guztiak banan-banan aztertutakoan.
Sopelako auzotarrek bere burua euskaldun dezaten, udal laguntzetan 10.500 euro banatuko ditu bertako Udalak. Auzokideek udal euskaltegitik kanpoko barnetegi zein euskaltegi ofizialetan eta homologatuetan egin ditzaketen ikastaro estandarrak sartzen dira laguntzaren eremuan. Bietan matrikula eta ikastaroen %50a finantzatuko du Udalak, barnetegietako egonaldiak alde batera utzita. Finkatutako 10.500 euroko gehienezko partida eskaerek gaindituz gero, kopuru osoa baldintzak betetzen dituzten hartzaileen artean banatuko dute. Sopeloztar bakoitzak laguntza bakarra eskatu ahal izango du eta ezin izango du euskara ikasten gastatu duena baino gehiago jaso, edozein dela beste erakundeengatik jasotako kopurua. Laguntzak pasa den astelehenean onartu zituen Imanol Garai alkateak dekretu bidez, eta udal iragarki-oholean argitaratu eta hurrengo 20 egunetan eskatu ahal izango dira. Argazkian, Leire Basauri euskara zinegotzia (ezkerrean) eta Imanol Garai alkatea (erdian) / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun