Itxura faltsuek ez gaitzatela engaina, ezta homofobia akabatu dugula pentsarazi ere. Egia da zenbait gauza hobera aldatu direla, batez ere legari dagokionez, baina gay, lesbiana eta transexualekiko diskriminazioak dirau eta modu askotan azaleratzen da; baita ere lehengo egunean gertaturikoa bezalako eraso zuzenen bidez. Gure gizartearen sektore batzuetan oraindik nagusi den homofobia honek ez du laguntzen bizitza-estilo eta desio diferenteak dituztenen arteko elkarbizitza. Batzuen iritziz, gainera, batere gozoa ez den errealitate honetan, eragin handikoak izan dira: alde batetik gure herriaren egoera soziopolitikotik eratorria den faxismoaren harropuztea, eta, beste aldetik, hainbat motatako fanatismo erlijiosoaren areagotzea.
Behean sinatzen dugun elkarteok segitzen dugu tinko holako jarrera deliktiboen kontrako konpromisoan; batez ere oinarrizko giza eskubide baten aurkako erasoa ere badirelako: geure sexualitatea eta geure aktibitatea askatasunean bizi ahal izateko eskubidea, hain zuzen. Hau dena, gizarte justuago eta berdintzaileago baten aldeko borrokaren testuinguruan kokatzen dugu.
Erasotuei elkartasuna adierazi nahi diegu eta besarkada beroa eman. Era berean, dei egiten diogu gizarteari adi egon dadin eta homofobiaren aurka modu aktiboan borrokatu dezan.
Bilbon, 2010eko azaroaren 2an.
E28 Koordinakundea: EHGAM, Bizigay, Euskal Hartzak, Aldarte, MDM eta Hegoak.
Joan den igandeko gauean, urriak 31, Bilbon, mutil bi, gazte-talde batek eginiko eraso homofobo baten biktima izan ziren. Erasoaren ondorioz, biak ospitaleratuak izan ziren eta haietako batek ospitalean larri jarraitzen du. Euskal Herrian eraso homofobo eta sexistak ez dira gauza berria. Hala eta guztiz ere, azken urteotan -hilabeteotan ere esan genezake-, eraso hauek nola ugarituz joan diren ikustea kezkatzeko modukoa da. Argazkian, 2009ko azaroaren 30ean, eraso homofoboak salatzeko elkarretaratzea egin zuten Bilboko Arriaga plazan / © EHGAM.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun