Urriaren 1etik itsasori begira ibili ostean, atzo, asteazkena, egin ahal izan zuten Punta Galea Big Challenge surf txapelketaren bosgarren edizioa. Aipatu proba Euskal Herrian egiten den olatu handien lehia bakarra da, antolatzaileen arabera. Energiaren Euskal Erakundearen (EEE) eta Red Bullen babespean, 8.000 euroko sariak banatu dituzte aurten parte-hartzaileen artean. Txapelketari goizeko 10:30ean eman zioten hasiera eta 14:00etara arte ibili ziren 16 surflarik olatu handiena hartu nahian. Tartean, hainbat epaile espezialista ibili ziren surflarien eboluzioak aztertzen. Horrenbestez, Indar Unanue zarauztarrak jantzi zuen olatu handienaren txapela eta, horregatik, 1.500 euro irabazi zituen. Bestalde, Jon Garai algortarra izendatu zuten eguneko surflaririk onena, 2.000 euroko saria emanez. Jaitsiera onena, berriz, David Bustamante "Zuku" sopeloztarrak egin zuen, 1.200 euroko saria jasoz. Argazkian, txapelketaren aurreko edizio bat / © Getxoko Udala.
Bitartean, Wipe out onenari sariaren 900 euroak Pilou Ducalmeri eman zioten. Frantziarra ospitalera eraman behar izan zuten surf taularekin jaso duen kolpearen eraginez, Gauzak horrela, zortzi sutura puntu eman behar izan zizkioten. Azkenik, 200 euro bana jaso zuten Pello Etxebarria "Bonbero", Xabier Guerrero, Adur Letamendia, Andres Caro, Pablo Solar, Eneko Acero, Alex Gironi, Natxo Gonzalez, Txaber Gaminde, Jaime Fernandez, Jesus Suarez eta Aritza Saratxagak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun