Euskal presoak Euskal Herriko lantokietara ekartzea aldarrikatuko du bihar Areetan LABek
"Euskal presoak Euskal Herrira! Euskal presoak lantokietara!" lelopean, elkarretaratzea deitu du ostiral honetarako, azaroak 5, Eskumaldeko LABek. Hitzordua Areetako Xake plazan jarri dute sindikatuko kideek, eguerdiko 12:30ean. Txorierri, Mungialdea eta Uribe Kosta hartzen duen Eskumaldeko LAB sindikatuak hilabetean behin egiten du kontzentrazioa Ipar Uribe eskualde handian, beti lehenengo ostiralean eta herriz herriz txandakatuz. Arratsaldean, berriz, mobilizazioa egingo dute Algortan, Iker Beristain preso politikoaren aitatasun eskubideak aldarrikatzeko. Hitzordua 20:00etan jarri dute Telletxen. Gose greban 21 egun egingo ditu gaur algortarrak, Frantziako Meaux espetxean Jare bere alaba jaio berria ikusten uzten ez diotelako. Argazkian, LAB sindikatuak Algortan egindako kontzentrazioetako bat.
Kartzela horretan Beristainekin dauden Iñaki Arietaleanizek, Beñat Aginagaldek eta Alex Uriartek bat egin zuten protestarekin, baita Chateauroux espetxe frantziarrean dauzkaten Eñaut Aramendik eta Mattin Olzomendik ere. Uribe Kostako Amnistiaren Aldeko Mugimenduak jakinarazi duenez, joan den asteburuan etxekoen bisita izan zuten Meaux espetxeko presoek, eta "bataz beste 10 kilo galdu dute jada". Urriaren 14an ekin zioten gose grebari. "Iker ahul baina tinko dagoela esan du haren emaztea, haserre eta amorruz, baita ere, alaba ikusten uzten ez dutelako", errepresioaren kontrako erakundeak gaineratu duenez. Dirudienez, LeVert epailea hasiera bateko espetxeko erantzunarekin ados ez zegoela esan eta oraindik ez omen du espetxera eskatu dizkion beste hainbat zehaztapenen erantzunik jaso, eta horren zain ei dago zerbait esateko. "Asteburu honetan bere emaztea umearekin joan zen espetxeraino, baina umeari, bi hilabeteko umeari alegia, ez zioten pasatzen utzi, amarengandik berezituz eta amaren bularra ere ukatuz aldi horretan. Bidaia umearekin egitea gogorra ere badela azpimarratu nahi izan du, baina Ikerri umea lehen aldiz ikusten utziko zioten esperantzarekin joan zen bertaraino", salatu du AAMk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun