Espainiako Auzitegi Nazionalak 111 urteko kartzela zigorra ezarri dio Manex Zubiaga Bravo preso politiko algortarrari, 2001eko urriaren 12an Madrilen egindako Espainiako Indar Armatuen desfilearen aurkako atentatuan parte hartzea egotzita, Europa Press albiste agentzia espainolak zabaldu duenez. Teresa Sandoval fiskalak 112 urte eskatu zituen gaztearentzat, urriaren 14an egindako epaiketan. Horretaz gain, Ana Belen Egues Gurrutxaga eta Aitor Garcia Aliaga ustezko ETAko kideekin batera, 636.023 euroko kalte ordaina ordaindu beharko die hogei zaurituei, 223.621 euro autoak eztanda egin zuen aparkalekuaren emakidunei eta 26.815,69 euro Madrilgo Udalari. Argazkian, Zubiaga iaz, Espainiaratu zutenean / © Espainiako Barne Ministerioa.
Manex Zubiaga 2002an atxilotu zuten Frantzian. Hainbat alditan espainiaratu zuten behin behinean, epai zezaten. Horrelako batean, 1.481 urteko espetxe zigorra jarri zioten, Juan Junquera Poliziako Unitate Zientifikoko idazkariordearen aurka atentatua egin zuelakoan. Atentatuan 94 zauritu egon zirela, 95 hilketa saiakera inputatu zizkioten. Frantzian ezarritako zigor guztiak bete ostean, joan zen urtean eraman zuten berriro Espainiara. Hasiera batean Soto del Realgo espetxean egon zen, baina harrez gero Estremerako Madrid VI espetxean dago.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun