Galdakaoko Guzur Aretxa Kultur Elkarteak antolatuta, hilaren 13an, larunbata, Arkaitz Estiballes galdakoztarrarekin arituko da bertsotan Fredi Paya algortarra, Gandasegi eskolan egingo duten bazkarian. Hitzordua 14:30ean jarri dute eta txartelak 12 eurotan daude. Egun berean, Lorebeltz, Powerages (AC/DCri tributua), Doctor Deseo, S.A. eta Esne Beltza-rekin batera emango du kontzertua Siroka talde leioaztarrak, 18:30etik aurrera. Horretarako, karpa erraldoia jarriko dute Iturrondo plazan. Guzur Aretxa elkarteak 25 urte bete ditu aurten. Hori dela eta, aste osoko egitaraua prestatu dute ekimenez beteriko mende laurdena ospatzeko. Egun handiena larunbata izango dute. Jaialdirako sarrerak aldez aurretik eros daitezke hainbat tokitan, 17 eurotan; tartean, Algortako UK tabernan. Aurretik erosi ezin dutenek, bestalde, egunean bertan eskuratu ahal izango dute 20 eurotan. Hala ere, antolatzaileek jakinarazi dutenez, karpak toki mugatuak izango ditu. Argazkian, Guzur Aretxa elkarteko familia argazkia / © Guzur Aretxa.
Guzur Aretxa Kultur Elkarteak hainbat ekintza antolatu ditu urteetan zehar Galdakao herrian: San Juanak, Inauteriak eta Santa Ageda, besteak beste. Aurten, talde galdakoztarrak 25 urte betetzen ditu eta, hori ospatzeko, hilaren 8tik 14ra bitartean hainbat ekimen antolatu dituzte. Bihar, astelehena, Guzur Aretxaren ibilbideari begirada emango dion hitzaldiarekin emango diote hasiera asteari. Etzi, berriz, Gernikako Akordioa sinatu zuten eragile sozial, sindikal eta politiko nagusienak bilduko dituzte mahai-inguru batean, "Gatazkaren konponbidean minimo demokratikoak" lelopean. Asteazkenean, Palestinaren inguruko hitzaldi bat izango dute. Gainera, hainbat antzezlan eta emanaldik osatuko dute aste kulturala. Larunbatean, hilak 13, egun handia izango dute: bertso-bazkaria eta kontzertuak izango dira herrian. Azkenik, astea behar bezala amaitzeko, herriko ume eta gazteei eskainiriko eguna izango da igandekoa. Jolasak, tailerrak eta Txan Magoaren ikuskizuna egongo dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun