Ortuzarren arabera, baina, gobernu konstituzionalistak Sopelara ez ezik bestelako udal eta foru erakundeetara eramatea kaltegarria litzateke hiritarrentzat: "gero, Gobernura iristen dira eta gobernatzen ez dakitela erakusten dute. PP eta PSE elkarrekin doaz eta helburu bakarra dute. Guk baino zenbaki handiagoa egitea. Berdin die gehiengo sozialak. Berdin die gehien bozkatutako zerrenda. Ideia bat baino ez dute, EAJri Gobernua kentzea. Horixe da beraien iparra. Hori da Espainiaren iparra PP eta PSOErentzat".
Ortuzarrek hitz horien bidez aipatu nahi izan zituen Antonio Basagoiti, "berak esan baitu EAJri kendu nahi diola Gobernua", eta Jose Antonio Pastor. "Pastorrek ere esan du hau, Bizkaiko hautagaiak Bizkairako duen apustua da, "aldaketa lasaia" EAJ eta Jose Luis Bilbaoren aurrean. Eta "aldaketa lasai" hau da Alderdi Popularrarekin duten akordioa aldundi eta udaletara hedatzea. Ez izan zalantzarik".
Andoni Ortuzar Euzko Alderdi Jeltzalearen BBBren lehendakariak Sopelako batzokia berrinauguratzeko ekitaldia protagonizatu zuen atzo eguerdian egindako ekitaldian. Berarekin batera, Josu Landaluze bertako zinegotzia eta hautagaia izan zen. Landaluzek azken lau urteen inguruko azterketa egin zuen, aurrera eramandako beharrarekin pozik agertu zela. "Bost zinegotzi gaude hamazazpiko talde batean gobernatzen eta osoko bilkurara eraman diren gaien %98 ondo irten dira; oinarrian eta laburbilduz, zera egin dugu: galdetu, entzun eta egin" azaldu zien alkategaiak alderdikide eta zaleei. Ortuzarrek, berriz, udal hauteskundeetan PP eta PSE-EEren arteko balizko koalizioak izan zituen hizpide: "zenbakiak egoki geratzen zaizkien tokian, PP eta PSE alderdiak gobernatzen saiatuko dira. Hori da beren helburu nagusia: Gobernua kentzea". Argazkian, Landaluze artxiboko irudi batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun