Dagoeneko neurriak hartzen hasi dira Lakuako Gobernutik, koordinazioa areagotuz eta larrialdi zerbitzuak indartuz. Gauzak horrela, SOS-Deiak Larrialdiak Koordinatzeko Zentroak beharrezko abisu guztiak helarazi die kostaldeko udalei, beharrezko prebentzio neurriak har ditzaten. Gorria da maila handieneneko alerta meteorologikoa. Herritarrentzat arrisku argia dagoela eta kalte materialak handiak izan litezkeela erakusten du. Larrialdiei Aurregiteko eta Babes Zibileko Zuzendaritzak honako aholkuak helarazi dizkie herritarrei:
Prebentzio neurri gisa:
- Olatuak apurtzen diren lekuetatik (arrokak, kai-muturrak, moilak...) urrundu.
- Ez hurreratu itsas pasealekuetara, kai-muturretara edota itsaslabarretara, itsasoaren indarrak uretara bota zaitzake.
- Autoz ibiltzekotan, ez hartu itsasotik hurbil dauden errepideak.
- Urpean igeri egiteko asmoa baduzu, bertan behera utzi.
- Saihestu ontzien erabilera eta amarrak aztertu. Ur kirolik ez egin, inola ere ez.
Larrialdi neurri gisa:
- Itsasora erortzekotan, olatuak apurtzen diren tokietatik urruntzen saiatu, laguntza eskatu eta erreskatatu arte itxaron.
- Olatuek eramaten bazaituzte, lasaitu; ez igeri egin korrontearen kontra, kostaldeko korronteek indarra galtzen baitute hainbat tokitan.
Eusko Jaurlaritzaren Herrizaingo Sailak alerta gorria ezarri du gaur, euskal kostaldeko hainbat lekutan 8 metrotik gorako olatuak egon daitezkeelakoan bihar. Euskalmeten arabera, bi une kritiko suerta daitezke astearte honetan: lehenengoa, goizaldeko 6ak aldera, itsasgorarekin batera. Batez besteko marea-maila 4,5 metrora hel daiteke eta olatuak 7 metro baino gehiagokoak izan daitezke. Bigarren itsasgorarekin batera, berriz, 8 metroko olatuak espero dira, 18:00etatik aurrera. Asteazkenetik aurrera, eguraldiak hobera egingo duela aurreikusi dute. Bihar kostaldetik aldentzea eta itsas-jarduerak saihestea gomendatu du Herrizaingo Sailak. Argazkian, 2009ko urtarrilaren 24an, goizaldean, zikloi batek jo zuen euskal kostaldea, besteak beste, Algortan kalte ugari eraginez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun