"Gabi etxean nahi dugu!" lelopean herri ekimena abiatu dute Sopelan hainbat eragile eta norbanakok. Algortarra izan arren, ez dira gutxi euskalgintzan, kulturgintzan eta bestelakoetan Gabi Basañezek sopeloztarrekin izandako hartu-emanak. Hartara, bera askatzea zein errepresioarekin amaitzea eskatzeko, atxikimenduak biltzen ari dira, Sopelako herritarren, kolektiboen, elkarteen eta alderdi politikoen artean. Besteak beste, mozioa aurkeztuko dute azaroko udal batzarrean, sinadura guzti horien laguntzaz. Horretaz gain, hilaren 28an, manifestazioa egiteko asmoa daukate, 13:00etan. Hala ere, Uribe Kosta eskualdeko mugak ere gainditu ditu ekimenak. Hau Pittu Hau euskaldunon konpartsak (taldekidea da Basañez) jakinarazi duenez, dagoeneko Bilboko Kalderapeko eta Errondabide tabernetan zein 7Katu gaztetxean jarrita daude idatzia (pdf) eta sinatzeko orriak. Bestalde, Iker Beristain preso algortarraren egoera salatzeko asmoz, LeVert epaileari gutunak bidaltzeko kanpaina abiatu du Uribe Kostako Amnistiaren Aldeko Mugimenduak. Argazkian, Algortako Bertsolari Eskolako (ALBE) kidea ere bada Gabi Basañez.
Irailaren 28an goizaldean Espainiako Polizia Nazionalak Askapenaren aurkako sarekadan 7 lagun atxilotu zituen, hauen artean Gabi Basañez algortarra. Inkomunikazioa pairatu ondoren urriaren 1ean Espainiako Audientzia Nazionaleko Ruz epaileak danak jaso eta erakunde terroristako kide izatearen akusaziopean Walter Wendelin, Gabi Basañez, Haritz Ganboa, Unai Vázquez eta David Soto kartzelatu zituen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun