Asteazken honetan, azaroak 10, lore eskaintza egingo du Leioako Udalak, tokiko arduradunen hitzetan, "biolentziaren biktima izan diren guztiak gogoratzeko". Hitzordua eguerdiko 12etan jarri dute, udaletxeko plazan. Gauzak horrela, parte hartzeko deia luzatu die leioaztar guztiei Udalak. Kaleratutako adierazpenean (doc) jasotzen denez, "ETAk, hau da, euskaldunon arteko elkarbizitza oraindik mehatxatzen jarraitzen duen talde terrorista bakarrak eragindako beldurraren biktimak; baina, baita ere, beste talde terrorista batzuek eragindako biktimak. Talde horiek, nahiz eta gaur egun iraganekoak izan, sufrimendua eragin zuten eta, horregatik, biktima horiek ere aintzatespen eta aitormen berak merezi dituzte". Argazkian, Eneko Arruebarrena Leioako alkatea.
Bitartean, Eusko Legebiltzarreko Bozeramaileen Batzordeak ez du adostasunik lortu Oroimenaren Eguneko testuaren inguruan. Leioan bezala, Araba, Bizkaia eta Gipuzkoako hainbat tokitan egongo dute asteazkenean. Eusko Alkartasunak eta Aralarrek ez dute dokumentua sinatu, bai ordea EAJk, PSEk, PPk, EBk eta UPyDk. Terrorismoaren biktima guztiak omen dakartza gogora idatziak, baina ETA bakarrik aipatzen du. Horrek ekarri du taldeen arteko desadostasuna. Oraingoz, elkarretaratzeak egingo dituela azpimarratu du Aralarrek, "biktima guztientzat, aitorpen guztia" eskatzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun