Joan den astetik mobilizazioetan murgilduta dabiltza ELA, LAB, CCOO, UGT, ErNE eta SVPE sindikatuak. Egunero, bi ordutako lanuztea egiten ari dira langileen ordezkariak, non eta apropos ikusten duten lekuan. Bitartean, ez dira gutxi "Murrizketarik ez" lelopeko pegatina paparrean daramaten udal langileak.
Azken udal batzarra
Besteak beste, urriaren 29rako, goizeko 9etatik 11ak arteko lan uztea iragarria zegoen eta udal langileak udaletxe aurrean bildu ziren. Udal batzarra hasi eta gutxira "Ez, ez, ez, murrizketarik ez" eta beste lelo batzuk ozenki zabalduz langile andana batzar aretora sartu zen eta osoko bilkura eten egin zuten. 11:00ak aldera langile gehienak euren lanpostuetara itzuli ziren eta sindikatuetako ordezkariak bakarrik geratu ziren batzar aretoan. Une horretan alkateak langileen ordezkarien kanporatzea agindu zuen eta udaltzainek lurrean eseritakoak banaka banaka atera arazi zituzten. Alternatiba alderdiko hautetsiak bat egin zuen langileen ekintzarekin eta bera ere kanporatua izan zen. Ondoren ez zen Udal Batzarrera bueltatu. Ezker abertzaleko hautetsiek udal langileekin izan ziren udaletxe atarian. Udal langileen protestarekin bat egin zuten, baina behin batzar aretora sartuta, Gabi Basañez eta Imanol Beristain kartzelatutako herrikideen egoeraren salaketari lehentasuna emanez, kanporatuak ez izateko jarrera mantendu zuten.
Azaroaren azken astean lanuzteetara deitu dituzte Getxoko udal langile guztiak
Imanol Landa alkate jelkideari "jarrera negoziatzaile eskasa" izatea egotzi diote Getxoko udal langileen ordezkariek. Luis Alamansa PSE-EEren bozeramaileari, berriz, soldata murrizketen aurrean tokiko agintariari "babes osoa" ematea leporatu diote. Patxi Valdes ELAko ordezkariak gaur adierazi duenez (mp3, espainolez), Landarekin izandako batzarrean, zurrumurruak egia zirela baieztatu zien alkateak. "Hala ere, neurri berria udal batzarrera eraman aurretik langileen ordezkariekin egongo zela esan zigun. Bada, bildu ginen egun berean bere hitza bete ez eta Getxoko Udalaren webgunean argitaratu zuten (espainolez) zer egin gura duten", kritikatu du sindikatukoak. Gauzak horrela, azaroko azken astean, Udalean ez ezik, horren menpeko erakunde autonomoetan (Getxoko Kultu Etxea, Getxo Kirolak eta Jesusen Bihotza Nagusien Etxea) ere egingo dituzte bi ordutako lanuzteak, "errekorteak osoko bilkurara eraman ez ditzaten". Orotara, 800 beharginek baino gehiagok deituta daude mobilizazioetara. Argazkian, Patxi Valdes ezkerrean gaurko prentsaurrekoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun