Hamabi mila euroko balioa duten bitxiak lapurtu dituzte Leioako bitxi-denda batean
Joan den ostegunean, hilaren 4an, gizon gazte batek 12.000 euroko balioa duten urrezko 30 pieza lapurtu zituen Leioako Diland bitxi-dendan, "El Correo Español" egunkariak zabaldu duenez. Lapurretak bi minutu baino gutxiago iraun zuen. Dirudienez, hori ez zen posible izango neska batek kanpoko tinbrea jo izan ez balu. Izan ere, ustezko lapurrak bitxiak ikuskatzen zebilen bitartean, emakume gazte batek atea jo zuen tokiko langileak hura zabal zezan, eta, momentuan, mutilak harrapakinarekin ihes egin zuen. Ertzaintzaren ikerlarien arabera, adin-txikikoa den neskatilaren agerpena "momentu klabea" izan zen. Horregatik konplizea izan zitekeela uste dute.
Lapurreta "di-da batean" izan zela dio Oscar Diaz bitxi-dendaren jabearen semeak. Erakusketa oihala zabalduta zegoenean, "bezeroak" telefono dei bat jaso zuen. "Bost segundo baino ez zuen iraun deiak", gaineratu du beharginak. Eskegi bezain laster, neska gazte batek dendako atea jo zuen. Orduan, Diazek atea zabaltzeko botoia sakatu eta, momentuan, mutikoak bitxiz beteriko oihala hartu eta kalera irten zen "korrika bizian". "Neskatoa ikaratuta zegoela zirudien eta lekuko moduan deklaratzeko eskatu nion", adierazi du jabearen semeak. Neska gazteak horrela egin zuen. Poliziarekin kolaboratu zuen, baina, momentu zehatz horretan agertu izanak konplizea izan zitekeen susmoak zabaldu ditu. Ertzaintzak ustezko lapurra topatzeko ikerketa lanak hasi ditu. Horretarako, dendako segurtasun kameraren irudiak erabiliko ditu. Izan ere, gazteak aurpegia estali barik lapurtu zituen bitxiak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun