Gaur hasita eta datozen egunotan zehar zenbait musika emanaldi ikusteko parada izango dute eskualdeko melomanoek. Kasu batzuetan, Uribe Kostan eta Erandion bertan. Beste batzuetan, ordea, eskualdeko musikariak kanpoko kontzertuetan lagunduz. Lehenengo emanaldia Moby Dick bakarlari algortarrak emango du gaur Bilboko Zazpi Kaleetan. "No salgo hasta Nochevieja" izeneko biraren barruan, 20:30ean, Texasko Balmorhea taldearekin batera arituko da Eneko, El balcon de la Lola aretoan. Ikusleek bederatzi eurotan erosi ahal izango dute sarrera. Bihar, osteguna, berriz, Those Radios Berango eta Getxoko taldea arituko da Itzubaltzeta / Romoko Trokazulo tabernan, arratsaldeko 8etatik aurrera, sarrera doakoa dela. Egun berean, Areetako Zeharbide tabernan, Mind The Gap (MTG) musika bandak joko du, 22:30etik aurrera, doan hori ere bai. Ostiral eta larunbatean ere izango da zertaz gozatu. Argazkian, Moby Dick / cc-by-nc-sa Moby Dick Love.
MTG laukoteak adierazi duenez, denbora batez jotzeari utziko diote. Beraz, biharkoa izango da oholtzara bueltatu aurreko azken kontzertua. Bestalde, webgunean jarri dute eskuragarri "Tone Revolution" euren azken lana. Areetan ez ezik, Leioan eta Algortan ere jarraituko du musika eskaintzak ostiralean. 22:30etik aurrera, Senegalgo Galsene Warriorz taldeak joko du Kurkudi herriko tabernan. Horiek hip-hop borrokalaria egiten dute, antolatzaileek adierazi dutenez. Reverendos taldea, berriz, Areetako El Comercio aretoan eskainiko du kontzertua, 22:30ean. Egun horretan ere, Algortako Hezetasun auzoko jaien baitan Kuenta Atras tokiko taldearen kontzertzua izango da entzungai. Larunbatean, Galdakaoko Guzur Aretxa elkartearen 25. urteurrenaren baitan, Siroka talde leioaztarra arituko da, Doctor Deseo, Soziedad Alkoholika, Esne Beltza eta hainbat talderekin batera. Urrun joan barik, baina, izango da zer entzun larunbatean. Izan ere, Erandioko Sentinel Rock Klubak Vinagre taldearen emanaldia hartuko du, 22:00etatik aurrera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun