Argazkiak ordaintzea ere eskaini du "Gara"ren zuzendariak, baina UKBERRI.NETetik ez dugu eskaintza onartu, gure filosofia oso bestelakoa baita eta gure argazkiak, testuak bezala, askeak baitira.
Hori dela eta, berretsi diogu gure argazkiak libreki erabiltzeko aukera, beti ere dagokien sinaduraz lagunduta. Juaristik hitza hartu eta berea ere eman digu, sinatu gabeko argazkiak errepika ez daitezen arreta gehiago jarriko dutela esanik.
Azkenik, kontu bakar batean ez gara jarri ados "Gara" eta UKBERRI.NET. Haien ustez, ez zen beharrezkoa kontu hau publikoa egitea. Bidalitako posta elektronikoak erantzun ez izana, egunero jasotzen dituzten ehunaka mezuengatik arrazoitu dute, eta arazoa telefonoz konpon zitekeelakoan daude.
Dena den, emandako hitza "Gara" egunkariari eta bere langileei publikoki eskertu nahi diegu. Bereziki, Josu Juaristiri eskerrak ematen dizkiogu, pertsonalki afera honetan eskua hartu izateagatik.
UKBERRI.NET Uribe Kosta eta Erandioko agerkari digitalaren erredakzio kideak
Atzo, asteartean, gutun publikoa idatzi genion "Gara" egunkariari, gure argazkiak egile aitortzarik gabe erabiltzeagatik kritikatuz. Gaur, berriz, Josu Juaristi "Gara"ko zuzendariak deitu eta izandako bi akats "ez kontzienteengatik" barkamena eskatu digu. Juaristik esan digunaren arabera, "Gara"ko erredaktoreei egunero hainbat eta hainbat argazki heltzen zaie herrietatik eta askotan bidaltzen dutenak ez dira argazki horien egileak. Hori dela eta, lizentzia eta egile eskubideak ez urratzeko zirkularra zabaldu zuten bere garaian baina beti ez dute izaten irudiak kontrastatzeko aukera eta denbora, eta noizbait hutsuneak izan dira. Argazkian, polemikako zati bat izan den irudietako bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun