Albaro Arri preso algortarra urrundu egin dute
2010ko aza. 10a, 23:24
Uribe Kostako Amnistiaren Aldeko Mugimenduak Etengabe bitakoraren bitartez adierazi duenez, Albaro Arri Pascual Algortako preso politikoa joan den ostegunean atera zuten Asturias aldeko Villabona espetxetik. "Gaur telefonoz jakinarazi die bere etxekoei Castello II (Herrialde Katalanak) espetxean dagoela", argitu dutenez. Arri Espainiako Auzitegi Nazionalak ezarri zion 208 urteko espetxe zigorra betetzen ari da. 1994ko uztailaren 29an Madrilgo Ramales plazan gertatutako Francisco Veguillas Espainiako Armadako teniente jeneralaren eta bi lagunen hilketa leporatzen diote. 2005eko irailaren 22ko epaiketan, "militarren ibilgailua igarotzen ari zela Madril komandoko kideei bonba zartarazteko abisua ematea" egotzi zioten algortarrari; Veguillas, auto-gidaria eta garraiolari baten heriotza eraginez. Castello II Albocasser Algortatik 550 bat kilometrotara dago, autoz joateko. Villabona, ordea, 300 bat kilometrotara zegoen. Argazkian, presoak etxeratzeko aldarrikapena balkoi batean.Abokatuek, baina, behin baino gehiagotan mahaigaineratu dituzte "prozesu honetan izandako akats ugari eta nabarmenak". Horretaz gain, "akusazioak izan zuen froga falta, torturaren bitartez eskuratutako deklarazio batzuekin ordezkatu zuten, nahiz eta deklarazio haiek bakarrik deklarazio polizialak izan, eta gainera, gero, epailearen aurrean ukatu eta adierazi eragindako torturen ondorio zirela", errepresioaren aurkako erakundearen arabera. Hala ere, 2007ko urtarrilaren bukaeran, Espainiako Auzitegi Gorenak atzera bota zuen abokatuen helegitea. Eta 2008ko apirilean sententzia berretsi zuen Espainiako Auzitegi Konstituzionalak, abokatuaren errekurtsoa atzera botata. Lehenagoko destinoa Kordoban izan zuen 2008ra arte. Urte horretako abenduan, baina, Villabonara gerturatu zuten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun