Larunbaterako 125 lagun lortu ditu jada Itsasoruntzek
2010ko aza. 11a, 13:41
Larunbat honetan, azaroak 13, Ibaizabalgo uretan murgilduko da berriro Itsasoruntz, "egun bizi dugun egoerari bultzada emateko, elkarrizketa sustatzeko". Goizeko 10:30ean jarri dute hitzordua, Areetako Bizkaiko Zubiko plazan, itsasadarreko bi aldeak giza-katez lotzeko asmoz. Hori lortzeko, gutxienez, bustiko diren ehun lagun behar zituztela adierazi zuten duela bi aste antolatzaileek. Bada, dagoeneko 125 lagun inguruk eman dute izena. Horrek ez du esan nahi "bustitzeko" aukerarik egongo ez denik. Ez daukatenentzako surf ohola ere jarriko du Itsasoruntzek. Hori bai, kamiseta gorria, berdea edo zuria jantzi beharko dute parte hartzaile guztiek, "Bizkaiko Zubi inguruak konpromiso, esperantza eta bake eta justiziaren koloreez tindatzeko". Argazkian, Aste Nagusian itsasadarrean gora joan ziren Itsasoruntzeko kideek / cc-pd Itsasoruntz.Baina, uretan ez ezik, lehorrean ere "prozesuaren alde bustiko diren lagunak" behar dituzte. Gauzak horrela, azaroaren 13an, itsasadarraren bi aldeak ere "konprometitutako herritarrez" betetzera deitu dute. Bestalde, bertaraino garraio publikoa erabilita gerturatzea gomendatu diete, uretan zein uretatik kanpo, ekimenean parte hartu nahi dutenei. Izan ere, Bizkaiko Zubi inguruetan ez da izaten aparkatzeko leku nahikorik. Giza-katea osatzeaz gain, hamaiketakoa, salda, musika, dantzak, bertsolariak... izango dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun