Datorren asteari dagokionez, hilaren 18an, ostegun kulturalak hasiko dira Leioako Ganeko tabernan, garai batean Bilboko Espuelan egiten ziren moduan. Bilbokoan zen bezala, ALBEko kide Galder Bilbao "Txapi" da taberna leioaztarreko arduraduna. Bada, lehendabiziko saio bezala, Bizkaiko bertsolari txapelketa izango da entzungai Ganekon, Bilbaok adierazi duenez.
Bihotza Gazte
Zortzigarren edizioa betetzen du aurten Algortako Bertsori Eskolak bertsolari beteranoak herrira ekartzeko Bihotza Gazte bertso-festak. Imanol Lazkano iaz ere izan zen Algortan eta berarekin batera, Manolo Arozena. Eta duela bi urte, Mikel Mendizabal eta Imanol Muruak osatu zuten kartela. Bertsolari beteranoen jakituriaz gozatzeko ALBEk urtero antolatzen duen saioa dugu honako hau, baina ez da urtean zehar adineko bertsolariekin gauzatzen duten bertso saio bakarra. Bestalde, Anjel Larrañaga abeslari eta pandero jolea, Xabier Alberdi Zabale trikitilaria eta Juan Ezenarro Berastegi perkusio joleak osatzen duten hirukoteak, Kupelak, trikitia, musika eta animazioarekin osatuko du bertsolarien saioa.
Ubideko euskal jaiaren egitaraua:
11:00 Umeentzako txalaparta tailerra.
12:00 Trikitilariak.
13:00 Bertso saioa: Beñat Vidal leioaztarra, Galder Bilbao "Txapi" algortarra eta Manex Sagarna igorretarra. Gai jartzailea: Josian Pagola Ubideko alkatea.
Jateko: Indabada herrikoia.
20:00 Esti eta Olatz Zeanuriko euskal kantariak.
Ondoren, DJ Planea atzo, gaur eta biharko euskal punk-rock musikarekin...
Etxean zein kanpoan bertsoak egongo dira entzungai asteburuan
2010ko aza. 11a, 18:44
Algortako Bertsolari Eskolak (ALBE) antolatuta, Jose Luis Gorrotxategi eta Imanol Lazkano bertsolariek euren eskarmentu handia erakutsiko dute bihar, ostirala, Algortako Kasino ondoko The Piper's taberna irlandarrean. Gaueko bederatzietan hasiko da saioa. Bihotza Gazte bertso-festaren zortzigarren edizioan, ohi bezala, Urola bailarako Kupela musika taldea ere arituko da, trikitia eta panderoarekin. Sarrera doakoa izango da. Eskualdeko hainbat bertsolari, berriz, etxetik kanpo ibiliko dira asteburu honetan. Larunbatean, 13:00etatik aurrera, bertso saioa eta babajan herrikoia izango dira Ubiden (Igorre goian) dagoen Herriko jatetxean. Bertan arituko dira kantu kantari ALBEko kide Beñat Vidal leioaztarra eta Galder Bilbao "Txapi" algortarra, Manex Sagarna Igorreko bertsolariarekin batera. Gai-jartzailea Josian Pagola Ubideko alkatea izango da. Bazkarian izena emateko (12 euro) 945 450 339 telefono zenbakira deitu edo Ubideko herriko tabernara jo beharko da. Azkenik, igandean, "Zalditik zaldira asto gainean" bertso poteoa egingo dute Zamudion. Fredi Paya algortarrak, Etxahun Lekue larrabetzuarrak eta Xabat Galletebeitia "Toko" lekeitiarrak bertsotan egingo dute zaldi eta asto gainean, 12:30ean Susterrak tabernatik abiatuta. Argazkian, Ubideko saioan Beñat Vidal eta Manex Sagarnarekin batera abestuko du Galder Bilbaok.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun