Mobilizazioa deitu dute biharko Bizkaiko merkataritzan
2010ko aza. 11a, 19:57
ELA, UGT, CCOO eta LAB sindikatuek Bizkaiko merkataritza osoan greba iragarri dute hurrengo hilabeteetarako. Elikagai, ehun, metal, zapata, merkataritza orokorra eta altzari merkataritzako hiru lanuzteak abendua eta urtarrila artean izango dira. Bihar, berriz, mobilizazioa egingo dute eguerdiko hamabietatik ordu bietara Bilboko Kale Nagusian. LAB sindikatuko ordezkariek jakinarazi dutenez, CEBEK Bizkaiko merkataritzako patronalarekin ia bi urtez negoziatzen jardun eta gero, "lau sindikatuok bat gatoz bere azken eskaintza iraingarritzat jotzerako orduan". CEBEK eta CECOBI patronalen asmoa argia dela uste dute sindikatuek: "merkataritzako langileak hitzarmen probintzialek ezertarako ez dutela balio ondorioztatzera iritsi arte negoziazioak luzatzea". Hitzarmenak berandu sinatzera heldu nahi dutela salatu dute langileen ordezkariek, "estatu mailako hitzarmenetan gertatzen den bezala". Argazkian, denda bat itxita aurreko greba batean.Merkataritza sektorea oso "feminizatuta" dagoela adierazi dute sindikatuek. Horretaz gain, lanaldiak oso luzeak direla, lanaldi partzialeko kontratazioak direla nagusi eta soldata oso baxuak dituztela salatu dute. "Badakigu denda guztietara iristeak ahalegin sindikal ikaragarria eskatzen digula, baina patronalaren eskaintza miserableen aurrean ez dutela etsiko adierazi digute langileek. Finean, mobilizatzeko prest daudela, euren hitzarmenaren alde egiteko gogotsu. Horretarako kalera aterako dira bihar", jakinarazi dute LAB sindikatukoek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun