Lehen Mundu Gerra amaitu ondoren, Euskal Herrira itzuli eta Getxon bizitzera etorri zen Andres Isasi, musikagintzan aritzeko asmoz. Bere lanek argi eta garbi erakusten duten Erdialdeko Europako eragina eta musika alemaniarraren ezaugarri nabarmenak dituzte. Estiloaren zehaztasunaren, leuntasunaren eta zailtasunaren ondorioz, bere musika aurreratuegia omen zen garai horretan eta euskal musikazaleek hozkeriaz hartu zituzten Isasiren konposizioak. Ezaxolakeria handia zelarik ere, konposizioak idazten jarraitu zuen Isasik bere baliabide ekonomikoei esker, musika bizimodua izan gabe. Bere musika ekoizpenean, pianorako piezak, liederrak, piano eta orkestrarako kontzertu bat, bi sinfonia, aipatutako piano kuartetoak eta "Angelus" ahots-lana nabarmendu behar dira. Azken horrekin arrakasta handia lortu zuen Budapesten 1930ean.
Andres Isasi laukotea
Karsten Dobersek (biola), Guillaume Martignek (biolontxeloa), Anna Bohigasek (biolina) eta Myriam Theveneau (biolina) osatzen dute Andres Isasi laukotea. Taldea Novalis laukotearen baitan sortu zen 2003an Munichen, nazioarteko musikari alemaniarrak bultzatuta. Batetik, Alemaniako kulturaren sakontasuna eta konplexutasuna eta, bestetik, hegoaldeko musikaren lirismoa eta sentsualitatea adierazi nahi du taldeak. Andres Isasi musikagilearen laukoteak, zeinaren izena omenaldi modura hartu zuen taldeak, filosofia horren isla dira. Karsten Dobers laukotearen biola-jotzaile eta Musikene musika-zentroaren irakasleak bultzatuta, laster argitaratuko dute disko bat Isasiren laukote guztiekin Naxos International diskoetxean.
Bihar, larunbata, Andres Isasi musikagilearen pieza baten erabateko estreinaldia izango da arratsaldeko zortzietatik aurrera, Areetako udal musika eskolan: hari instrumentuetarako laugarren kuartetoa, alegia. Getxo udalerriarekin lotura estua izan zuen konpositorearen izena hartu zuen laukoteak interpretatuko du pieza hori. Kontzertuaren egitaraua Giacomo Pucciniren eta Alexander Borodinen hari instrumentuetarako piezez osatzen da. 1920an konposatu zuen Andres Isasik (Bilbao, 1890 / Algorta, 1940) laugarren kuartetoa. Zazpi piezez osatutako serie baten barruan dago eta horietako bi entzuteko aukera baino ez zuen izan Isasik bizirik zegoela. Bere jaioterrian hasi zuen musika prestakuntza eta ondoren, garaiko musikari gehienak ez bezala, Berlinera joan zen ikasketekin jarraitzeko, Parisera joan beharrean. Bertan, Engelbert Humperdinck "Hansel eta Gretel" operaren egilearen ikaslea izan zen eta "Amor dormigo" poema sinfonikoa estreinatu zuen 1914an. Argazkian, Andres Isasi laukotea / © Getxo Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun