Euskararen Nazioarteko Eguna ospatzeko jarduera ugari antolatu ditu Sopelako Udalak
Abenduaren 3ko Euskararen Nazioarteko Egunaren harira, Sopelako Udalak hainbat jarduera antolatu ditu, gure hizkuntzaren omenetan. Gazte eta nagusiei zuzenduta, "Zer ikusi, ha ikasi" materialean oinarritutako bi orduko tailerrak egingo dituzte bihar, hilaren 23an eta 30ean; eta abenduaren 14an eta 21ean, 18:00etatik 20:00etara, Kurtzio kultur etxean. Azaroaren 27an, larunbata, haurrentzako mitologia parkea izango da 12:30etik 14:30era eta 18:00etatik 20:30era, udaletxeko plazan. Sagardo festa ere egingo dute bertan, 12:30etik 14:30era. Hurrengo egunean, igandean, haurrek euskal jolasen parkearekin gozatzeko aukera izango dute, 11:00etatik 14:30era eta 16:30etik 19:00etara, Kurtzio kultur etxean. Arratsaldean, berriz, Erdizka lauetan musika taldearekin erromeria izango da, 19:00etan, udaletxeko plazan. Bestalde, hilaren 29an, astelehena, bertso-saioa egingo dute, 19:30ean, Kurtzio kultur etxean. Argazkian, hainbat neskato dantzan Aitxu! Sopelako euskara taldeak antolatutako aurreko erromeria batean.
Abendura salto emanez, hilaren 1ean haurrentzako "Mitologia tailerra III: Basajaun basoan jaun" ekintza hasiko dute arratsaldeko seietan, Kurtzio kultur etxeko ludotekan. Abenduaren 3an, ostirala, ipuin kontalaria egongo da toki berean, 17:30ean. Gainera, arratsaldeko 19:00etan, komeriaren kluba izango dute ikusgai gazte eta helduek. Abenduaren 5ean, igandea, Durangoko azokara egingo dute irteera goizeko hamarretan. Eta, azkenik, abenduaren 18an, larunbatean, Izarren Distira gala egingo dute arratsaldeko zazpietan, Kurtzio kultur etxean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun