Aurtengo berritasuna Euskara Saria izango da; euskararen erabilera babestu, sustatu edo hedatzeko zereginetan nabarmendu diren erakunde, elkarte edo pertsonari emango zaion ikurra, alegia. “Saria emateko kontuan hartuko dira saritutako lan edo jardueraren kalitatea eta esanahia eta euskararen normalizazioaren alor guztietan egindako ekarpena. Ibilbidea eta jarraitasuna ere kontuan hartuko dira”, azaldu du Loroñok. Saria udalerriko artisau batek, Luis Artolak, egindako oroigarria izango da. Hori abenduaren 2an banatuko dute, 20:00etan, udaletxeko areto nagusian. Horrenbestez, hautagaiak aurkezteko epea azaroaren 22ra arte luzatuko dute eta edozeinek bidal dezake proposamena honako helbide honetara: euskara.zerbitzua[abildua]getxo.net. Euskara Zerbitzuaren Aholku Batzordeak aukeratuko du saritua eta ondoren Udalak berretsi beharko du. Horren izena azaroaren amaieran emango dute ezagutzera. Bestalde, Komunikazio zinegotziak aipatutakoaren arabera, “oso pozik eta harro gaude jardunaldiak aurrera eramateko herri ekimena eta ekimen instituzionalaren artean dagoen lankidetzaz eta osagarritasunaz, jarduera asko udalerriko hainbat elkarte eta talderen lanari esker eramango direlako aurrera". Gaineratu duenez, "euskarak beti edukiko du gure babesa” .
Egitaraua
Egitarauari dagokionez, urtero bezala gustu eta adin guztientzako jarduera ugari izango dira, gaur hasi eta abenduaren 19ra arte. Horien artean honako hauek izango dira: “Getxoko izenak” liburuari buruz Mikel Gorrotxategi egilearekin mintzatzeko aukera bi egunez, Izarren Distira gala, pintxo tailerra, graffiti ikastaroa gazteentzat, “Getxo, akordaten naz II” dokumentalaren berrestreinaldia, "Merkatuan kantetan" ekimena, bertso poteoa, Gariren kontzertua, Algortako Bertsolari Eskolaren (ALBE) gala; eta azkenik, "GetxONegin" pintxo lehiaketaren bigarren edizioa, abenduaren 18an eta 19an, ostalarien eta bezeroen artean euskara sustatzeko asmoz. Lehiaketara aurkeztu nahi dutenek azaroaren 26a baino lehen izena eman beharko dute, Euskara Zerbitzuan. Horrenbestez, lehen aipatu bi egunetan pintxoa euro batean salduko dute ostalariek eta, horien artean, hiru sari banatuko dituzte: epai-mahaiarena, publikoarena eta "hizkuntza-pasaia txukunena" duen establezimenduarentzat (euskararen erabilera "txukunenari", alegia). Izan ere, ekimen horren helburua merkatariei euskara erabiltzea gehigarri bat izan daitekeela erakustea da.
Iparra Galdu Gabe
Getxoko Udalak adierazi duenez, Iparra Galdu Gabe Jardunaldien balantzeak nahiko datu onak utzi ditu. Urriaren erdialdetik azaroaren erdialdera izan diren jardueretan guztira bi mila bat lagun izan dira, tokiko iturrien arabera. Horietatik, 750 bat herritar hurbildu ziren Jon Cazenaveren erakusketa ikustera. "Otto" umeentzako antzerkia 300 ume egon ziren ikusten eta trinket partida beste berrehun. Bestalde, Cazenave txokolatearen dastaketak oso harrera ona eduki zuen. Azkenik, trikitixa jaialdian 250 lagun izan ziren eta bertsolarien kanporaketan 400.
Euskara Saria emango dute lehenengo aldiz Getxoko Euskal Kulturaren Jardunaldietan
"Argia ereiten" lelopean, gaur, asteazkena, abiatuko da Getxoko Euskal Kulturaren Jardunaldien hamabigarren edizioa. Bada, "euskararen erabileraren aldeko lana eskertzeko", Euskara Saria emango dute lehendabiziko aldiz. Urtero bezala, ekimenak abenduaren 3ko Euskararen Nazioarteko Egunaren inguruan egingo dituzte, egun gure hizkuntzaren eta euskal kulturaren alde egiten dena getxoztarrei erakusteko eta hurbiltzeko helburuarekin. Horrekin batera, "euskaraz bizi nahi dutenei, horretarako aukera ahalbidetu nahi diegu, ezin dugulako ahaztu gure udalerrian euskararen egoera hobetzen doala etengabe", Josu Loroño Komunikazio zinegotziaren aburuz. Egun Getxo udalerriko hamar biztanletatik hiru euskaldunak dira eta bi ia euskaldunak, tokiko arduradunak nabarmendu duenez. Gaur bertan, Mikel Gorrotxategi Euskaltzaindiko kidearekin mintzatzeko aukera egongo da, berak idatzitako “Getxoko izenak. Aldeetxe eta leku izenak” izenburuko liburuaren inguruan. Saioa 18:00etan izango da, Algortako Fadura kiroldegiko areto nagusian. Argazkian, besteak beste, abenduaren 4an kontzertua emango du Garik, Areetako Andres Isasi musika eskolan / cc-by Iker Merodio.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun