Uribe Kosta topatzen asmatu du "Hitzetik Hortzera"-k

Erabiltzailearen aurpegia
Algortako Bertsolari Eskolaren (ALBE) lanari esker, Euskal Herrian bertso saio gehien burutzen den eskualdetariko bat da Uribe Kosta. Halere, azken urteotan, otsail aldera bertan egiten den Abra Sariari ezik ezeri ez dio begiratu Euskal Herriko Bertsozale Elkarteak. Gauzak horrela, "Bapatean" bertso liburuetan eta elkarteak ETBn egiten duen "Hitzetik Hortzera" saioan, horren berri baino ez dute eman azken urteotan. Hori dela eta, albistea da "Hitzetik Hortzera"-k Algortaraino pasa den ostiralean hurbildu izana. Amua The Piper's taberna irlandarrean jarri zieten, Jose Luis Gorrotxategi, Imanol Lazkano eta Kupela taldea umoretsu aritu baitziren Bihotza Gazte ekimenaren barruan. Bertan grabaturiko erreportajea igande honetan ikusi ahal izango da, ETB1-en, 21:00etatik aurrera eta eitb.com-en. Argazkian, Gorrotxategi, ezkerrean, eta Lazkano, eskuman / © "Hitzetik Hortzera" - Euskal Herriko Bertsozale Elkartea - EITB.
ALBEk, urte mordo daramatza Bihotza Gazte izeneko saioa antolatzen. "Bertsolari beteranoentzat propio sortutako plaza da eta giro itzela izaten dute urtero", elkartetik gogoratu dutenez. Aurten Izarraizpetik ekarri zituzten Jose Luis Gorrotxategi eta Imanol Lazkano. Festa konpletoa izateko azken urteetan Kupela taldea ere gonbidatu finkoa izaten dute eta "behin hara joanda Anjel Larrañaga ere presto jarri ohi da bertso kanturako panderoa utzi ahala. Numero dotoreak grabatu zituen 'HH'-ko lantaldeak", haiek beraiek aitortu bezala.

Umorea Arantzan eta "Bertsolari" aldizkaria

Baina Algortakoa ez da igandean ikusi ahal izango dugun bertso saio bakarra, ezta umorea hizpide izan duen bakarra ere. Izan ere, Alaia Martinekin eta Miren Amurizarekin egindako bertso afaria "ez dute berehalakoan ahaztuko Arantzan". Bi neska gazteek errepaso galanta eman zioten Ekaitza elkartean bildutako entzule-jendeari, batzuk lotsa-gorrituz eta gainontzekoen irri karkailak askatuz. Gainera, "Zapping" atalean, Arantzan bertan, 1992ko irailean, Andoni Egañak eta Jon Sarasuak egindako saio gogoangarria berreskuratuko dute; Sarasuak bertso-kantua utzi nahi zuen, saioaren luzeagatik akituta-edo, eta Egaña berriz gerrarako, ekin eta ekin.

Apur bat serioago, Josu Martinez izango du alboan Jon Artano "Hitzetik Hortzera"-ko aurkezleak. Bilboko sortzaile gazteak "Bertsolari" aldizkariko koordinatzailea izateko beta ere hartzen du eta berriki kaleratuko den udazkeneko alearen edukiak aurreratuko ditu platoan. Gainera, udan Palestinako bertsolariekin izandako hartu-emanaren irudiak ere ekarriko ditu.

Bainujantziak eta laneko buzoak

Azkenik, Bertsoa.com-ek Ataunen jasotako bertsoaldi zirtolaria ere emango dute. Iban Urdangarin eta Anjel Mari Peñagarikano bainujantzitan elkarri begira jarri zituen Jon Aizpurua gai-jartzaileak Ataungo San Martin jaietako bertso saioan. Zuri-beltzekoan Euxebio Igartzabalek laneko buzoari botatako pare bat bertso zorrotz gogoratuko dituzte.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun