Guztira, hamasei gaztek parte hartuko dute etzi, igandean, Getxo udalerri mailako Izarren Distira Galaren hirugarren edizioan, Euskal Kulturaren Jardunaldien baitan. Sei taldetan banatuta, arratsaldeko zazpietan hasiko dira lehian, Areetako Andres Isasi Musika Eskolan. Bertara joan ahal izateko gonbidapenak udal kultur aretoetan eskuratu behar izango dira. Aurtengo edizioan, Romo-Artatza institutuko bi taldek, Aixerrotako batek, Fadurako beste batek eta San Nikolas ikastolako bik jardungo dute. Neska-mutil gehienak 13 urtekoak dira eta dantzak, abestiak zein bakarrizketak eskainiko dituzte. Nerea Alias aurkezleak gidatuko du ikuskizuna eta Txorierriko eta Durangoko galetan irabazle izan diren gazteek ere parte hartuko dute. Horiekin batera, Antzart taldea eta DJ Novo izango dira bertan. Argazkian, duela bi urteko edizioaren irabazleak.
Epai-mahaia Andrea Arrizabalaga aurkezleak, Itsaso Paya aktore eta bertsolari algortarrak eta Lander Otaola “Vaya Semanita” telebista saioko aktore ohiak osatuko dute. Sariak ondokoak izango dira: lagunentzako multi-abentura ekintzak edo ikas-bidaiarako diru-laguntza; hainbat partida Lasergunean; afaria lagunekin; eta liburutan zein diskotan gastatzeko bono bana.
Pintxo tailerra
Bihar, larunbatarekin, pintxo tailerra egingo du Sendik, 5 urtetik gorako haurrei zuzenduta. Datorren astean, hilaren 22tik 24ra, berriz, graffiti ikastaroa izango da 14 eta 17 urte bitarteko gazteentzat, Bizarra Lepoan elkartearen eskutik. Izen ematea 667 540 241 telefono zenbakian edo info[abildua]bizarralepoan.org posta elektronikoan egin dezakete interesatuek. Asteazkenean ere "Getxo Akordaten naz II" dokumentalaren berrestreinaldia eta www.ukaldizkaria.biz gunearen aurkezpena izango dira Algortako Kasinoan, 20:00etan hasita, doako sarrerarekin. Eta hurrengo egunean, Julen Gabiria itzultzailearekin mintzatzeko aukera egongo da Aldai patronatuan, gaia "Hilobiko isiltasuna” bere nobela beltza dela.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.