Euskalmet Euskal Meteorologia Agentziaren arabera, giro nahasia espero da biharko. Haize zakarragatik alerta horia ezarri du Eusko Jaurlaritzako Herrizaingo Sailak, haize-boladek 100 km/h-ko abiadura gaindi dezaketelako gauerditik biharko zazpiak arte. Iragarpenak dio larunbatean zeru ilunarekin argituko duela egunak, eta euri-jasak espero direla lurralde osoan. Eguerdian ostarte batzuk irekiko dira, arratsaldean zehar berriro zerua estaliz joango da eta euria egingo du. Haizea ere zakar ibiliko da, hego-mendebaldetik joko du goizean eta arratsaldean mendebaldera egingo du. Tenperaturak 9 eta 15 gradu artean egongo dira. Igandean ere euria egingo du eta tenperaturak jaitsi egingo dira. Euri-jasak lurralde osoan emango dira, baina ipar partean sarriago egingo du euria eta zaparradak mardulagoak izango dira. Tenperatura maximoak 12 eta 13 gradu artean egongo dira kostaldean; barnealdean berriz, 9-10 gradu inguruan, eta haizeak ipar-mendebaldetik joko du. Elur-kota 1200-1300 metroren bueltan ibiliko da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun