Bisiten ondoren, etxebizitzen plano bat egin dute, larrialdi egoera batean erreskate lanak errazteko. Horretaz gain, suteak prebenitzeko eskuliburua eman diete bizilagunei, segurtasun gomendio batzuekin batera. “Ondorioen artean, azpimarra daiteke, bisitatutako etxebizitzen %66k ez duela sutea edukitzeko arrisku potentzialik, baina kea detektatzeko aparailua ipini diete, zerbait gertatzekotan, alerta denborak murriztu ahal izateko. Kontuan hartu beharreko gauza bat da bisitatutako etxebizitzen %23k ez duela elektrizitate kontaktuetarako babes egokia eta diferentzial bat jartzeko gomendioa luzatu diete”, azpimarratu zuen Coriak.
Bigarren fasea
Suteak prebenitzeko kanpainaren aurreneko fasearen garapen ona ikusita, bigarren fasea jarri dute martxan, 86 eta 89 urte bitarteko bizilagunei zuzenduta. Gainera, bigarren fase horretan, 65 urtetik gorako pertsona batekin bizi diren 89 urtetik gorako pertsonen etxeetara ere joango dira, aurrekoan bakarrik bizi diren 89 urtetik gorako getxoztarren etxeetan soilik jarri baita kea detektatzeko aparailua. Datorren urtarriletik aurrera guztira 400 bat etxetara joatea aurreikusten dute.
Getxoko Udalak kea detektatzeko 116 aparailu jarri ditu bakarrik bizi diren 89 urtetik gorako pertsonen ehun etxebizitzetan, suteak prebenitzeko urrian martxan jarritako kanpainaren lehenengo fasean. Aparailuak horrela banatu dituzte: 84 pisutan bana eta 16 etxetan bina, etxebizitzen metro koadroen, banaketaren eta bestelako ezaugarri teknikoen arabera. Aurreikusitako 169 bisitetatik 109 egin zituzten urriaren 4tik 20ra bitartean. Udal iturriek zehaztu dutenez, 34 alditan ezin izan ziren burutu, bizilagunak bizitokiz aldatu direlako, 9 pertsona aurkitu ez zituztelako eta bi zendu zirelako. Bestalde, 15 lagunek ez zuten interesik agertu, horietariko batzuek bazeukatelako prebentzio sistemaren bat. Egindako 109 bisitetatik ehun jabek aparailua jartzea onartu zuten eta gainontzeko 9ek ez, esan bezala, horrelako zerbait bazeukatelako instalatuta. “Oso pozik gaude lehenengo fasean izandako erantzunarekin, aurreikusitako etxe askotara heltzea lortu dugulako eta bizilagunen erantzuna eta harrera ezin hobea izan delako. Beste udalerri batzuetan esperientzia duen enpresak berak azaldu digu, bisitatutako pertsona nagusien jarrera oso ona izan dela”, nabarmendu zuen atzo Elena Coria zinegotziak. Argazkian, Elena Coria zinegotzia eta Imanol Landa alkatea ke detektagailua eskuan / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun